മുംബൈ: ഐപിഎല് മത്സരത്തിനിടെ ക്രിക്കറ്റ് ഉപകരണങ്ങളോട് അനാദരവ് കാണിച്ചതിന് മുംബൈ ഇന്ത്യന്സ് നായകന് ഹാര്ദിക് പാണ്ഡ്യക്കെതിരെ അച്ചടക്ക നടപടി. കൊല്ക്കത്ത നൈറ്റ് റൈഡേഴ്സുമായുള്ള പോരാട്ടത്തിനിടെ നിയന്ത്രണം നഷ്ടപ്പെട്ട് വിക്കറ്റ് ബെയ്ലുകള് തട്ടിത്തെറിപ്പിച്ചതിനാണ് താരത്തിന് മാച്ച് ഫീയുടെ 10 ശതമാനം പിഴ ചുമത്തിയത്. ഇതോടൊപ്പം ഒരു ഡെമെറിറ്റ് പോയിന്റും പാണ്ഡ്യയുടെ കരിയര് റെക്കോര്ഡില് രേഖപ്പെടുത്തി. ഈ മത്സരത്തില് മുംബൈയെ നാല് വിക്കറ്റിന് പരാജയപ്പെടുത്തി കൊല്ക്കത്ത പ്ലേഓഫ് സാധ്യതകള് സജീവമാക്കി.
കൊല്ക്കത്ത ബാറ്റിംഗിന്റെ പത്താം ഓവറിലായിരുന്നു നാടകീയ സംഭവങ്ങള് അരങ്ങേറിയത്. പന്തെറിയാനായി റണ്ണപ്പ് എടുക്കുന്നതിന് പിന്നിലേക്ക് നടക്കുന്നതിനിടെ, കടുത്ത നിരാശയിലായിരുന്ന ഹാര്ദിക് വിക്കറ്റിനടുത്തുകൂടി പോകുകയും കൈകൊണ്ട് ബെയ്ലുകള് ശക്തമായി അടിച്ചു താഴെയിടുകയുമായിരുന്നു. മൈതാനത്തെ കായിക സാമഗ്രികളെ കേടുവരുത്തുകയോ ദുരുപയോഗം ചെയ്യുകയോ അരുതെന്ന ഐപിഎല് പെരുമാറ്റച്ചട്ടത്തിലെ ആര്ട്ടിക്കിള് 2.2 ലംഘിച്ചതിനാണ് മാച്ച് റഫറി താരത്തിന് ശിക്ഷ വിധിച്ചത്. ഹാര്ദിക് കുറ്റം സമ്മതിച്ചതായാണ് വിവരം.
