ന്യൂഡല്‍ഹി: അമേരിക്കന്‍ വിദേശകാര്യ മന്ത്രി (സെക്രട്ടറി ഓഫ് സ്റ്റേറ്റ്) മാര്‍ക്കോ റൂബിയോ നാല് ദിവസത്തെ ഔദ്യോഗിക നയതന്ത്ര സന്ദര്‍ശനത്തിനായി ഇന്ന് ഇന്ത്യയിലെത്തും. രാഷ്‌ട്രീയവും ചരിത്രപരവുമായ ഏറെ പ്രാധാന്യമുള്ള കൊല്‍ക്കത്തയാണ് അദ്ദേഹത്തിന്റെ സന്ദര്‍ശനത്തിന്റെ ആദ്യ ഘട്ടം. പശ്ചിമ ബംഗാള്‍ നിയമസഭാ തിരഞ്ഞെടുപ്പില്‍ ബി.ജെ.പി അധികാരം പിടിച്ചെടുത്ത് ആഴ്ചകള്‍ മാത്രം പിന്നിടുമ്പോഴാണ് ഈ സന്ദര്‍ശനം എന്നത് രാഷ്‌ട്രീയ കേന്ദ്രങ്ങളില്‍ ഏറെ ശ്രദ്ധ നേടുന്നുണ്ട്.
കഴിഞ്ഞ 14 വര്‍ഷത്തിനിടയില്‍ കൊല്‍ക്കത്ത സന്ദര്‍ശിക്കുന്ന ആദ്യ യു.എസ് സ്റ്റേറ്റ് സെക്രട്ടറിയാണ് മാര്‍ക്കോ റൂബിയോ. ഇതിനുമുമ്പ് 2012 മേയില്‍ അന്നത്തെ യു.എസ് വിദേശകാര്യ മന്ത്രിയായിരുന്ന ഹിലരി ക്ലിന്റനാണ് കൊല്‍ക്കത്തയിലെത്തിയത്. അന്ന് ചരിത്രപ്രസിദ്ധമായ റൈറ്റേഴ്‌സ് ബില്‍ഡിങ്‌സില്‍ വെച്ച് മുഖ്യമന്ത്രിയായിരുന്ന മമത ബാനര്‍ജിയുമായി അവര്‍ ഒരു മണിക്കൂറിലധികം കൂടിക്കാഴ്ച നടത്തിയിരുന്നു. ബംഗാളിലെ 34 വര്‍ഷത്തെ ഇടത് ഭരണം അവസാനിപ്പിച്ച് മമത സര്‍ക്കാര്‍ അധികാരമേറ്റ തൊട്ടടുത്ത നാളുകളിലായിരുന്നു ആ സന്ദര്‍ശനം.
യു.എസ് കോണ്‍സുലേറ്റ് വൃത്തങ്ങള്‍ നല്‍കുന്ന വിവരമനുസരിച്ച്, സ്വീഡനില്‍ നിന്ന് ശനിയാഴ്ച രാവിലെ ഏഴ് മണിയോടെ കൊല്‍ക്കത്തയിലെത്തുന്ന റൂബിയോ, മദര്‍ തെരേസ സ്ഥാപിച്ച മിഷനറീസ് ഓഫ് ചാരിറ്റിയുടെ ആസ്ഥാനമായ ‘മദര്‍ ഹൗസ്’ സന്ദര്‍ശിക്കും. മെയ് 23 മുതല്‍ 26 വരെ നീളുന്ന റൂബിയോയുടെ ഇന്ത്യന്‍ പര്യടനത്തില്‍ കൊല്‍ക്കത്തയ്‌ക്ക് പുറമെ ആഗ്ര, ജയ്പൂര്‍, ന്യൂഡല്‍ഹി എന്നിവയും ഉള്‍പ്പെടുന്നുണ്ട്. ലോകത്തിലെ തന്നെ ഏറ്റവും പഴയതും ഇന്ത്യയിലെ ആദ്യത്തേതുമായ അമേരിക്കന്‍ കോണ്‍സുലേറ്റുകളിലൊന്ന് സ്ഥിതി ചെയ്യുന്ന കൊല്‍ക്കത്തയ്‌ക്ക് സന്ദര്‍ശനത്തില്‍ പ്രത്യേക ഊന്നല്‍ നല്‍കുന്നത് നയതന്ത്രപരമായി വലിയ പ്രാധാന്യത്തോടെയാണ് നിരീക്ഷകര്‍ കാണുന്നത്.
കൊല്‍ക്കത്തയും അമേരിക്കയും തമ്മിലുള്ള നയതന്ത്ര ബന്ധത്തിന് രണ്ട് നൂറ്റാണ്ടിലധികം പഴക്കമുണ്ട്. യു.എസ് എംബസി രേഖകള്‍ പ്രകാരം, 1792 നവംബര്‍ 19-ന് അമേരിക്കന്‍ പ്രസിഡന്റ് ജോര്‍ജ്ജ് വാഷിംഗ്ടണ്‍ ബെഞ്ചമിന്‍ ജോയിയെ കൊല്‍ക്കത്തയിലെ ആദ്യത്തെ അമേരിക്കന്‍ കോണ്‍സലായി നിയമിച്ചിരുന്നു. 17 മാസങ്ങള്‍ക്ക് ശേഷം അദ്ദേഹം കൊല്‍ക്കത്തയിലെത്തിയെങ്കിലും ബ്രിട്ടീഷ് ഈസ്റ്റ് ഇന്ത്യാ കമ്പനി അദ്ദേഹത്തെ കോണ്‍സലായി ഔദ്യോഗികമായി അംഗീകരിച്ചിരുന്നില്ല. എങ്കിലും ബ്രിട്ടീഷ് നിയമങ്ങള്‍ക്ക് വിധേയമായി ഒരു കൊമേഴ്‌സ്യല്‍ ഏജന്റായി തുടരാന്‍ അദ്ദേഹത്തിന് അനുമതി ലഭിച്ചു.
അനിശ്ചിതത്വങ്ങളോടെ തുടങ്ങിയ ആ ബന്ധം പിന്നീട് അമേരിക്കയും കൊല്‍ക്കത്തയും, അതോടൊപ്പം ഇന്ത്യയുമായുള്ള ശക്തമായ നയതന്ത്ര സൗഹൃദമായി വളരുകയായിരുന്നു. നിലവില്‍ പശ്ചിമ ബംഗാള്‍, ബിഹാര്‍, ജാര്‍ഖണ്ഡ്, സിക്കിം, അസം, അരുണാചല്‍ പ്രദേശ്, മണിപ്പൂര്‍, മേഘാലയ, മിസോറാം, നാഗാലാന്‍ഡ്, ത്രിപുര തുടങ്ങി കിഴക്കന്‍-വടക്കുകിഴക്കന്‍ മേഖലയിലെ 11 സംസ്ഥാനങ്ങളിലെ അമേരിക്കന്‍ നയതന്ത്ര ചുമതലകള്‍ നിയന്ത്രിക്കുന്നത് കൊല്‍ക്കത്തയിലെ യു.എസ് കോണ്‍സുലേറ്റാണ്.
പശ്ചിമേഷ്യയിലെ നിലവില്ലാത്ത സംഘര്‍ഷങ്ങളുടെ പശ്ചാത്തലത്തില്‍, ഇന്തോ-പസഫിക് മേഖലയില്‍ ശക്തമായ തന്ത്രപ്രധാന പങ്കാളിത്തം കെട്ടിപ്പടുക്കാന്‍ വാഷിംഗ്ടണ്‍ ശ്രമിക്കുന്ന സമയമാണിത്. ഇന്ത്യയുടെ കിഴക്കന്‍, വടക്കുകിഴക്കന്‍ മേഖലകളുടെ വര്‍ദ്ധിച്ചുവരുന്ന ഭൗമരാഷ്‌ട്രീയ-സാമ്പത്തിക പ്രാധാന്യമാണ് മാര്‍ക്കോ റൂബിയോയുടെ ഈ കൊല്‍ക്കത്ത സന്ദര്‍ശനത്തിലൂടെ വ്യക്തമാകുന്നത്.
