ന്യൂഡല്ഹി: കഴിഞ്ഞ കുറച്ചു ദിവസങ്ങളായി തുടരുന്ന കഠിനമായ ചൂടിന് കഴിഞ്ഞ ദിവസം രാവിലെ വീശിയ തണുത്ത കാറ്റ് നേരിയ ആശ്വാസം നല്കിയെങ്കിലും ഡല്ഹിയില് വരും ദിവസങ്ങളില് ചൂട് വീണ്ടും കടുക്കും. ഇന്ന് നഗരത്തില് ഓറഞ്ച് അലര്ട്ട് പ്രഖ്യാപിച്ച ഇന്ത്യന് കാലാവസ്ഥാ വകുപ്പ്, താപനില വീണ്ടും 44 ഡിഗ്രി സെല്ഷ്യസ് വരെ ഉയര്ന്നേക്കുമെന്ന് മുന്നറിയിപ്പ് നല്കി. ശനിയാഴ്ച ഔദ്യോഗികമായി ഉഷ്ണതരംഗം രേഖപ്പെടുത്തിയിട്ടില്ലെങ്കിലും, വരണ്ട കാറ്റും ഉച്ചസമയത്തെ കടുത്ത ചൂടും കാരണം ജനങ്ങള് കടുത്ത ദുരിതത്തിലാണ്.
കാലാവസ്ഥാ നിരീക്ഷണ കേന്ദ്രത്തിന്റെ പ്രവചനമനുസരിച്ച് മേയ് 28 വരെ ഡല്ഹിയില് മിക്ക ദിവസങ്ങളിലും ഉഷ്ണതരംഗത്തിന് സമാനമായ സാഹചര്യമായിരിക്കും. പകല് സമയത്തെ താപനില 43 മുതല് 44 ഡിഗ്രി സെല്ഷ്യസ് വരെ തുടരുമ്പോള്, രാത്രിയിലെ താപനില 30 ഡിഗ്രിക്ക് അടുത്തായിരിക്കുമെന്നത് രാത്രികാലങ്ങളിലും അസ്വസ്ഥത വര്ദ്ധിപ്പിക്കും. വരും ദിവസങ്ങളില് ഉച്ചതിരിഞ്ഞും വൈകുന്നേരങ്ങളിലും ശക്തമായ കാറ്റ് വീശാന് സാധ്യതയുണ്ട്.
മേയ് 25-ന് ആകാശം ഭാഗികമായി മേഘാവൃതമാകാനും ഇടിമിന്നലോട് കൂടിയ നേരിയ പ്രതിഭാസങ്ങള്ക്കും സാധ്യതയുണ്ടെങ്കിലും, ഇത് ചൂടിന് വലിയ ശമനം നല്കാന് ഇടയില്ലെന്ന് വിദഗ്ധര് ചൂണ്ടിക്കാണിക്കുന്നു. നീണ്ടുനില്ക്കുന്ന ഈ കടുത്ത കാലാവസ്ഥ മനുഷ്യരെ മാത്രമല്ല, ഡല്ഹി-എന്സിആര് മേഖലയിലെ പക്ഷിമൃഗാദികളെയും ദോഷകരമായി ബാധിച്ചിരിക്കുകയാണ്. നിര്ജ്ജലീകരണം, സൂര്യാഘാതം, മറ്റ് അണുബാധകള് എന്നിവ കാരണം തെരുവ് മൃഗങ്ങളും പക്ഷികളും കൂട്ടത്തോടെ രോഗബാധിതരാകുന്നതായി മൃഗസംരക്ഷണ പ്രവര്ത്തകരും ഡോക്ടര്മാരും പറയുന്നു.
നിര്ജ്ജലീകരണം മൂലം പ്രാവുകള് ബോധരഹിതരായി ആകാശത്തുനിന്ന് താഴേക്ക് വീഴുന്ന സാഹചര്യമുണ്ട്. കഴുകന് ഉള്പ്പെടെയുള്ള വലിയ പക്ഷികളെപ്പോലും റോഡരികുകളില് നിന്ന് അതീവ ഗുരുതരാവസ്ഥയില് കണ്ടെത്തുന്നുണ്ട്. കടുത്ത ചൂട് കാരണം തെരുവ് നായ്ക്കള്ക്കും മറ്റ് മൃഗങ്ങള്ക്കും വയറ്റില് അണുബാധയും മറ്റ് ശാരീരിക അസ്വസ്ഥതകളും വര്ദ്ധിച്ചിട്ടുണ്ട്. തീയേറ്റുന്ന കോണ്ക്രീറ്റ് റോഡുകളും കുടിവെള്ള സ്രോതസ്സുകളുടെ അഭാവവുമാണ് ഇവരുടെ അതിജീവനം കഠിനമാക്കുന്നത്.
കഴിഞ്ഞ കുറച്ചുദിവസങ്ങളായി ഡല്ഹിയുടെ പല ഭാഗങ്ങളിലും താപനില 45 ഡിഗ്രി സെല്ഷ്യസ് കടന്നിരുന്നു. വരും ആഴ്ചയിലും അപകടകരമായ രീതിയില് ചൂട് തുടരുമെന്നതിനാല് കുട്ടികള്, മുതിര്ന്ന പൗരന്മാര്, വെയിലത്ത് ജോലി ചെയ്യുന്നവര് എന്നിവര് പ്രത്യേക ജാഗ്രത പാലിക്കണമെന്നും നിര്ജ്ജലീകരണത്തിനെതിരെ കരുതലെടുക്കണമെന്നും കാലാവസ്ഥാ വകുപ്പ് മുന്നറിയിപ്പ് നല്കുന്നു.
