ന്യൂഡല്ഹി: വിദേശകാര്യമന്ത്രി ഡോ. എസ്. ജയശങ്കറും യുഎസ് സ്റ്റേറ്റ് സെക്രട്ടറി മാര്ക്കോ റൂബിയോയും തമ്മില് ന്യൂഡല്ഹിയില് വിപുലമായ ചര്ച്ചകള് നടത്തി. ഇരുരാജ്യങ്ങളും തമ്മിലുള്ള തന്ത്രപ്രധാന പങ്കാളിത്തത്തിന്റെ കരുത്ത് ആവര്ത്തിച്ചു പ്രഖ്യാപിച്ച നേതാക്കള്, വ്യാപാരം, ഊര്ജ്ജം, ജനങ്ങളുടെ സുരക്ഷിതമായ കുടിയേറ്റം (മൊബിലിറ്റി), പ്രാദേശിക സുരക്ഷ എന്നിവയുള്പ്പെടെയുള്ള പ്രധാന സഹകരണ മേഖലകള്ക്ക് അടിവരയിട്ടു.
ഇന്ത്യയും യുഎസും തമ്മില് ആഴത്തിലുള്ളതും വിപുലവുമായ ആഗോള തന്ത്രപ്രധാന പങ്കാളിത്തമാണ് പങ്കിടുന്നതെന്ന് ഡോ. ജയശങ്കര് പറഞ്ഞു. ഇരുരാജ്യങ്ങളും തമ്മിലുള്ള ബന്ധം ലോകത്തെത്തന്നെ സ്വാധീനിക്കുന്നതാണെന്നും വിവിധ മേഖലകളില് ഇരുവര്ക്കും സമാനമായ താല്പ്പര്യങ്ങളുണ്ടെന്നും അദ്ദേഹം ചൂണ്ടിക്കാട്ടി. സങ്കീര്ണ്ണമായ ആഗോള സാഹചര്യങ്ങള്ക്കിടയിലാണ് ഈ ചര്ച്ചകള് നടക്കുന്നതെന്ന് വ്യക്തമാക്കിയ അദ്ദേഹം, സുതാര്യവും ഫലപ്രദവുമായ ചര്ച്ചകളില് ആത്മവിശ്വാസം പ്രകടിപ്പിച്ചു.
വ്യാപാര കരാര് എത്രയും വേഗം പൂര്ത്തിയാക്കേണ്ടതിന്റെ ആവശ്യകത ജയശങ്കര് എടുത്തുപറഞ്ഞു. ഊര്ജ്ജ വ്യാപാരത്തിലെ വിപുലീകരണത്തെ സ്വാഗതം ചെയ്ത അദ്ദേഹം, ഇന്ത്യയുടെ ഊര്ജ്ജ സുരക്ഷയ്ക്ക് വൈവിധ്യമാര്ന്ന ഊര്ജ്ജ സ്രോതസ്സുകള് അത്യാവശ്യമാണെന്ന് ഊന്നിപ്പറഞ്ഞു. ജനങ്ങള് തമ്മിലുള്ള ബന്ധത്തിന്റെ പ്രാധാന്യം ചൂണ്ടിക്കാണിച്ച അദ്ദേഹം, നിയമപരമായ കുടിയേറ്റങ്ങളെ ഇത് ദോഷകരമായി ബാധിക്കരുതെന്നും ആവശ്യപ്പെട്ടു. തര്ക്കങ്ങളില് ചര്ച്ചകള്ക്കും നയതന്ത്രത്തിനുമുള്ള ഇന്ത്യയുടെ നിലപാടും തടസ്സമില്ലാത്ത സമുദ്ര വാണിജ്യത്തിന്റെ പ്രാധാന്യവും അദ്ദേഹം ആവര്ത്തിച്ചു.
ഇറാന് സംഘര്ഷത്തെക്കുറിച്ചുള്ള ചോദ്യത്തിന് മറുപടിയായി, ആഗോള ഊര്ജ്ജ വില കുറഞ്ഞുനില്ക്കുന്നതിലും തടസ്സമില്ലാത്ത വാണിജ്യം ഉറപ്പാക്കുന്നതിലും ഇന്ത്യക്കും യുഎസിനും ശക്തമായ താല്പ്പര്യമുണ്ടെന്ന് ജയശങ്കര് പറഞ്ഞു. ഇന്ത്യയെ അമേരിക്കയുടെ ലോകത്തിലെ ഏറ്റവും പ്രധാനപ്പെട്ട പങ്കാളികളിലൊന്നായി വിശേഷിപ്പിച്ച യുഎസ് സ്റ്റേറ്റ് സെക്രട്ടറി മാര്ക്കോ റൂബിയോ, ഇരുരാജ്യങ്ങളും തമ്മിലുള്ള ബന്ധത്തിന്റെ തന്ത്രപരമായ പ്രാധാന്യത്തെ ശക്തമായി അടിവരയിട്ടു. ഇരുരാജ്യങ്ങളും ഭീകരവാദം മൂലം കഷ്ടപ്പെട്ടിട്ടുണ്ടെന്നും പുതിയ നൂറ്റാണ്ടിനെ നിര്ണ്ണയിക്കുന്ന എല്ലാ പ്രധാന വിഷയങ്ങളിലും ഇന്ത്യയും യുഎസും തന്ത്രപരമായി ഒരുമിച്ചാണെന്നും അദ്ദേഹം പറഞ്ഞു.
ഊര്ജ്ജ രംഗത്തും ഇരുരാജ്യങ്ങള്ക്കും ഒരേ നിലപാടാണുള്ളത്. 21-ാം നൂറ്റാണ്ടിന് അനുയോജ്യമായ രീതിയില് അമേരിക്ക തങ്ങളുടെ കുടിയേറ്റ സംവിധാനം നവീകരിക്കുകയാണെന്ന് ഒരു ചോദ്യത്തിന് മറുപടിയായി റൂബിയോ വ്യക്തമാക്കി. ഇറാന് വിഷയത്തില് നല്ല വാര്ത്തകളുണ്ടെന്ന് സൂചിപ്പിച്ച അദ്ദേഹം, അടുത്ത ഏതാനും മണിക്കൂറുകള്ക്കുള്ളില് കൂടുതല് നല്ല പുരോഗതി പ്രതീക്ഷിക്കുന്നതായും അറിയിച്ചു. വരാനിരിക്കുന്ന ‘ക്വാഡ്’ വിദേശകാര്യ മന്ത്രിമാരുടെ യോഗത്തിന് മുന്നോടിയായി ഗള്ഫ്, ഇന്ഡോ-പസഫിക് മേഖലകളിലെ സംഭവവികാസങ്ങള് ഉള്പ്പെടെയുള്ള പ്രാദേശിക പ്രശ്നങ്ങളും ഇരു നേതാക്കളും ചര്ച്ച ചെയ്തു.
ഈ മാസം 26ന് നടക്കുന്ന ക്വാഡ് വിദേശകാര്യ മന്ത്രിമാരുടെ യോഗത്തില് പങ്കെടുക്കാനായി നാല് ദിവസത്തെ സന്ദര്ശനത്തിനായി ഇന്നലെയാണ് യുഎസ് സ്റ്റേറ്റ് സെക്രട്ടറി മാര്ക്കോ റൂബിയോ ഇന്ത്യയിലെത്തിയത്. ഇന്ത്യന് വിദേശകാര്യമന്ത്രി ഡോ. എസ്. ജയശങ്കര്, ഓസ്ട്രേലിയന് വിദേശകാര്യമന്ത്രി പെന്നി വോങ്, ജപ്പാന് വിദേശകാര്യമന്ത്രി തോഷിമിത്സു മൊട്ടേഗി, യുഎസ് സ്റ്റേറ്റ് സെക്രട്ടറി മാര്ക്കോ റൂബിയോ എന്നിവര് യോഗത്തില് പങ്കെടുക്കും. ഇന്ഡോ-പസഫിക് മേഖലയിലെ നിലവിലെ പ്രവര്ത്തനങ്ങളുടെ പുരോഗതി വിലയിരുത്തുന്നതിനൊപ്പം മുന്ഗണനാ മേഖലകളില് ക്വാഡ് സഹകരണം മുന്നോട്ട് കൊണ്ടുപോകുന്നതിനെക്കുറിച്ചും നേതാക്കള് പരസ്പരം കാഴ്ചപ്പാടുകള് പങ്കുവെക്കും.
