ദോഹ: വരാനിരിക്കുന്ന ഫിഫ ലോകകപ്പിനുള്ള ഖത്തര് ദേശീയ ഫുട്ബോള് ടീമിന്റെ 28 അംഗ പരിഷ്കരിച്ച പട്ടികയില് മലയാളി താരം തഹ്സിന് മുഹമ്മദ് സ്ഥാനം നിലനിര്ത്തി. പരിശീലകന് ജുലന് ലോപറ്റെഗുയി ആദ്യം പ്രഖ്യാപിച്ച 35 അംഗ സാധ്യതാ പട്ടിക വെട്ടിച്ചുരുക്കിയാണ് ഇപ്പോള് 28 പേരാക്കിയത്. അയര്ലന്ഡിനെതിരെ നടക്കാനിരിക്കുന്ന സന്നാഹ മത്സരത്തിന് ശേഷമാകും ലോകകപ്പിനുള്ള അന്തിമ 26 അംഗ ടീമിനെ ഖത്തര് പ്രഖ്യാപിക്കുക. ഈ അവസാന പട്ടികയിലും ഇടംപിടിച്ചാല് ലോകകപ്പ് ടീമിലെത്തുന്ന ആദ്യ മലയാളി എന്ന ചരിത്രനേട്ടം പത്തൊന്പതുകാരനായ തഹ്സിന് സ്വന്തമാകും.
രണ്ടാഴ്ചത്തെ നാട്ടിലെ പരിശീലനത്തിന് ശേഷം അയര്ലന്ഡിലെ ഡബ്ലിനിലേക്ക് പറക്കാനിരിക്കുന്ന സംഘത്തില് നിന്ന് പ്രമുഖ സീനിയര് താരങ്ങളെ കോച്ച് ഒഴിവാക്കിയത് ശ്രദ്ധേയമായി. സെബാസ്റ്റ്യന് സോരിയ, താരെക് സല്മാന് എന്നിവര്ക്ക് പുറമെ ബാസം അല്റാവി, മുഹമ്മദ് വാദ്, മുബാറക് ഷനാന്, നിയാല് മേസന്, ഫഹദ് യൂനസ് എന്നിവരും ടീമില് നിന്ന് പുറത്തായി. ഫിഫ നിയമപ്രകാരം ജൂണ് രണ്ട് വരെയാണ് ലോകകപ്പ് ടീമുകളെ ഔദ്യോഗികമായി സമര്പ്പിക്കാനുള്ള അവസാന തീയതി. അയര്ലന്ഡുമായുള്ള മത്സരത്തിന് ശേഷം ജൂണ് ആറിന് എല് സാല്വദോറിനെതിരെയും ഖത്തറിന് സന്നാഹ മത്സരമുണ്ട്.
നിലവിലെ മികച്ച ഫോം കണക്കിലെടുക്കുമ്പോള് തഹ്സിന് അന്തിമ സ്ക്വാഡില് ഉണ്ടാകുമെന്നാണ് ഫുട്ബോള് ലോകത്തിന്റെ വിലയിരുത്തല്. ഖത്തറില് ചീഫ് അക്കൗണ്ടന്റായ കണ്ണൂര് തലശ്ശേരി സ്വദേശി ജംഷിദിന്റെയും വളപട്ടണം സ്വദേശിനി ഷൈമയുടെയും മകനായ തഹ്സിന് ജനിച്ചതും വളര്ന്നതും ഖത്തറിലാണ്. ചെറുപ്രായത്തില് തന്നെ കളിമികവ് തെളിയിച്ച താരം ഖത്തറിന്റെ ജൂനിയര് ടീമുകളിലൂടെയാണ് വളര്ന്നുവന്നത്. തന്റെ പതിനേഴാം വയസ്സില് ഖത്തര് സ്റ്റാര്സ് ലീഗിലെ പ്രമുഖ ക്ലബ്ബായ അല് ദുഹൈലിന് വേണ്ടി കളത്തിലിറങ്ങിയ തഹ്സിന്, ഈ ലീഗില് പന്തുതട്ടുന്ന ആദ്യ ഇന്ത്യന് വംശജന് എന്ന റെക്കോര്ഡ് നേരത്തെ സ്വന്തമാക്കിയിരുന്നു.
ഖത്തര് ദേശീയ ടീമിനായി അണ്ടര്-16, അണ്ടര്-17, അണ്ടര്-19 ടീമുകളിലും താരം മുന്പ് ബൂട്ട് കെട്ടിയിട്ടുണ്ട്. ലോകകപ്പ് വേദിയില് ഖത്തര് ജേഴ്സിയില് ഒരു മലയാളി അണിനിരക്കുന്ന സുദിനത്തിനായുള്ള കാത്തിരിപ്പിലാണ് കായികപ്രേമികള്.
