ന്യൂഡല്ഹി: ഇന്ത്യന് കായിക ഭരണരംഗത്തെയും ഷൂട്ടിങ് രംഗത്തെയും പ്രമുഖ വ്യക്തിത്വവും മുന് അന്താരാഷ്ട്ര ഒളിമ്പിക് കമ്മിറ്റി അംഗവുമായ രാജാ രണ്ധീര് സിങ് (79) അന്തരിച്ചു. ഏഷ്യന് ഗെയിംസിന്റെ ചരിത്രത്തില് ഇന്ത്യയ്ക്കായി ആദ്യമായി ഷൂട്ടിങ്ങില് സ്വര്ണ്ണമെഡല് നേടിയ താരമാണ് അദ്ദേഹം. ഇന്ത്യന് ഒളിമ്പിക് അസോസിയേഷന്റെ സെക്രട്ടറി ജനറലായും ദീര്ഘകാലം സേവനമനുഷ്ഠിച്ചിട്ടുണ്ട്.
കായികരംഗത്തിന് നല്കിയ സംഭാവനകള് പരിഗണിച്ച് രാജ്യം അദ്ദേഹത്തെ അര്ജുന അവാര്ഡ് നല്കി ആദരിച്ചിരുന്നു. വിനിതയാണ് ഭാര്യ. പ്രശസ്ത ട്രാപ്പ് ഷൂട്ടര് രാജേശ്വരി കുമാരി, മഹിമ, സുനൈന എന്നിവര് മക്കളാണ്. 1978-ല് ബാങ്കോക്കില് നടന്ന ഏഷ്യന് ഗെയിംസിലാണ് രണ്ധീര് സിങ് ഷൂട്ടിങ്ങില് സ്വര്ണ്ണം നേടി ഇന്ത്യയുടെ പെരുമ ഉയര്ത്തിയത്.
ഏഷ്യന് ഗെയിംസ് ചരിത്രത്തില് ഷൂട്ടിങ് വിഭാഗത്തില് ഇന്ത്യ നേടുന്ന ആദ്യ സ്വര്ണ്ണപ്പതക്കമായിരുന്നു അത്. കരിയറില് അഞ്ച് തവണ ഒളിമ്പിക്സില് ഇന്ത്യയെ പ്രതിനിധീകരിച്ച് അദ്ദേഹം മത്സരിച്ചിട്ടുണ്ട്. മത്സരരംഗത്ത് നിന്ന് വിരമിച്ച ശേഷം കായിക ഭരണരംഗത്ത് അദ്ദേഹം സജീവമായി. 1987 മുതല് 2012 വരെയുള്ള നീണ്ട 25 വര്ഷക്കാലം ഇന്ത്യന് ഒളിമ്പിക് അസോസിയേഷന്റെ സെക്രട്ടറി ജനറലായി അദ്ദേഹം പ്രവര്ത്തിച്ചു. കൂടാതെ ഒളിമ്പിക് കൗണ്സില് ഓഫ് ഏഷ്യയുടെ തലപ്പത്തേക്ക് തിരഞ്ഞെടുക്കപ്പെട്ട ആദ്യ ഇന്ത്യക്കാരന് കൂടിയായിരുന്നു രണ്ധീര് സിങ്.
2001 മുതല് 2014 വരെ അന്താരാഷ്ട്ര ഒളിമ്പിക് കമ്മിറ്റിയുടെ (കഛഇ) ഓണററി അംഗമായും അദ്ദേഹം ചുമതല വഹിച്ചു. അനാരോഗ്യത്തെ തുടര്ന്ന് രണ്ട് വര്ഷം മുമ്പാണ് അദ്ദേഹം ഒ.സി.എ അധ്യക്ഷ സ്ഥാനം ഒഴിഞ്ഞത്.
