തിരുവനന്തപുരം: വിദ്യാര്ത്ഥിനികള്ക്ക് എല്ലാ മാസവും മൂന്ന് ദിവസം വരെ ആര്ത്തവാവധി അനുവദിക്കാനുള്ള സര്ക്കാര് നയത്തെ രൂക്ഷമായി വിമര്ശിച്ച് ബി.ജെ.പി കൗണ്സിലറും മുന് ഡി.ജി.പിയുമായ ആര്. ശ്രീലേഖ. ഈ തീരുമാനം പെണ്കുട്ടികളെ മാനസികമായി ശക്തരാക്കുമോ അതോ കൂടുതല് അബലകളാക്കുമോ എന്ന് അവര് ചോദ്യമുയര്ത്തി. തന്റെ ഔദ്യോഗിക ഫെയ്സ്ബുക്ക് പേജിലൂടെയാണ് യു.ഡി.എഫ് സര്ക്കാരിന്റെ ഈ പുതിയ നയത്തിനെതിരെ അവര് രംഗത്തുവന്നത്.
ആര്ത്തവം എന്നത് സ്ത്രീകളുടെ സ്വകാര്യമായ അഭിമാനമാണെന്ന് ശ്രീലേഖ ചൂണ്ടിക്കാട്ടി. ആ ദിവസങ്ങളില് ചിലര്ക്ക് ശാരീരിക ബുദ്ധിമുട്ടുകളും കഠിനമായ വേദനയും ഉണ്ടാകാറുണ്ടെന്നത് സ്വാഭാവികമാണ്. എന്നാല് കടുത്ത വേദന അനുഭവിച്ചിരുന്ന തന്റെ വിദ്യാര്ത്ഥിക്കാലത്ത് ഒരിക്കല് പോലും ഈ കാരണം പറഞ്ഞ് സ്കൂളിലോ കോളേജിലോ പോകാതിരുന്നിട്ടില്ലെന്ന് അവര് ഓര്മ്മിപ്പിച്ചു. കഠിനമായ ഐ.പി.എസ് പരിശീലന സമയത്തുപോലും പെണ്കുട്ടികള് ഇത്തരം ശാരീരിക ബുദ്ധിമുട്ടുകള് പറഞ്ഞ് വ്യായാമ മുറകളില് നിന്ന് മാറിനിന്നിട്ടില്ലെന്നും, തീരെ വയ്യാത്ത അടിയന്തര സാഹചര്യങ്ങളില് മാത്രമാണ് അവധിയെടുത്തതെന്നും അവര് വ്യക്തമാക്കി. പ്രതിസന്ധികളെ നേരിടുന്ന അത്തരം നിലപാടുകളാണ് സ്ത്രീകളുടെ യഥാര്ത്ഥ ശക്തിയെന്ന് മുന് ഡി.ജി.പി കൂട്ടിച്ചേര്ത്തു.
പുതിയ നിയമം വരുന്നതോടെ എല്ലാ മാസവും ക്ലാസില് വരാതിരിക്കുന്ന പെണ്കുട്ടികളുടെ ആര്ത്തവ തീയതികളെക്കുറിച്ച് വീട്ടുകാര്ക്കും അധ്യാപകര്ക്കും നാട്ടുകാര്ക്കും കൃത്യമായ വിവരങ്ങള് ലഭിക്കും. ഇത് സ്ത്രീകളുടെ ആര്ത്തവ അന്തസ്സിന് ചേര്ന്നതാണോ എന്നും ഇതൊരു നാണക്കേടല്ലേ എന്നും ശ്രീലേഖ ചോദിക്കുന്നു. മാസത്തില് മൂന്ന് ദിവസം അവധി നല്കുന്നതുപോലുള്ള സൗജന്യങ്ങള്ക്ക് പിന്നാലെ പോകാതെ, എല്ലാ വിദ്യാഭ്യാസ സ്ഥാപനങ്ങളിലും പെണ്കുട്ടികള്ക്കായി വൃത്തിയുള്ള ശൗചാലയങ്ങളും സാനിറ്ററി നാപ്കിന് വെന്ഡിംഗ് മെഷീനുകളും സ്ഥാപിക്കാന് സര്ക്കാര് മുന്കൈ എടുക്കണം.
അത്യാവശ്യ ഘട്ടങ്ങളില് ഉപയോഗിക്കാന് അനുയോജ്യമായ വേദനസംഹാരി മരുന്നുകള് വിദ്യാലയങ്ങളില് ലഭ്യമാക്കുകയാണ് വേണ്ടത്. ഇത് വിദ്യാര്ത്ഥിനികള്ക്കും അവിടുത്തെ വനിതാ ജീവനക്കാര്ക്കും ഒരുപോലെ ഉപകാരപ്പെടും. ഈ കാരണം മുന്നിര്ത്തി പഠനം മുടക്കി ഒരു ദിവസം പോലും വീട്ടിലിരിക്കാന് ഒരു പെണ്കുട്ടിയും ആഗ്രഹിക്കുമെന്ന് തനിക്ക് തോന്നുന്നില്ലെന്നും, സാധാരണ നിലയില് ഒരു മാതാപിതാക്കളും ഇതിനോട് യോജിക്കില്ലെന്നും പറഞ്ഞാണ് ആര്. ശ്രീലേഖ തന്റെ ഫെയ്സ്ബുക്ക് കുറിപ്പ് അവസാനിപ്പിക്കുന്നത്.
