നെടുമങ്ങാട്: നെടുമങ്ങാട് കരിക്കുഴിയില് ഒന്നരവയസ്സുകാരന് അര്ഷിദിന്റെ മരണം കൊലപാതകമാണെന്ന് സ്ഥിരീകരിച്ച് പ്രാഥമിക പോസ്റ്റ്മോര്ട്ടം റിപ്പോര്ട്ട് പുറത്ത്. കുട്ടിയുടെ ശരീരത്തിലേറ്റ തുടര്ച്ചയായ മര്ദനത്തെ തുടര്ന്ന് ആന്തരിക അവയവങ്ങളിലുണ്ടായ രക്തസ്രാവമാണ് മരണത്തിന് കാരണമായതെന്ന് റിപ്പോര്ട്ടില് വ്യക്തമാക്കുന്നു. സംഭവവുമായി ബന്ധപ്പെട്ട് കുട്ടിയുടെ അമ്മ അഖിലയെയും രണ്ടാനച്ഛന് അഷ്കറിനെയും പോലീസ് കസ്റ്റഡിയിലെടുത്തു.
കരിക്കുഴിയില് വാടകയ്ക്ക് താമസിക്കുന്ന അഖിലയുടെ മകന് അര്ഷിദിനെ കഴിഞ്ഞ ദിവസമാണ് തിരുവനന്തപുരത്തെ എസ്.എ.ടി ആശുപത്രിയില് എത്തിച്ചതെങ്കിലും ജീവന് രക്ഷിക്കാനായില്ല. അഷ്കര് ചോറ് നല്കുന്നതിനിടയില് കുട്ടി ഛര്ദ്ദിച്ചെന്ന് പറഞ്ഞാണ് ആശുപത്രിയില് പ്രവേശിപ്പിച്ചത്. ഈ സമയത്ത് കുട്ടിയുടെ അമ്മ അഖില നൃത്തപരിപാടിക്കായി തമിഴ്നാട്ടിലായിരുന്നു. കുട്ടിയുടെ മരണത്തില് ദുരൂഹത ആരോപിച്ച് അര്ഷിദിന്റെ അമ്മൂമ്മയും (അമ്മയുടെ അമ്മ) മുത്തശ്ശനും (അച്ഛന്റെ അച്ഛന്) പോലീസില് പരാതി നല്കിയതോടെയാണ് ക്രൂരമായ പീഡനവിവരങ്ങള് പുറത്തുവന്നത്.
രണ്ടാനച്ഛനായ അഷ്കര് കുട്ടിയെ നിരന്തരം ക്രൂരമായി ഉപദ്രവിക്കാറുണ്ടായിരുന്നുവെന്ന് ബന്ധുക്കള് പറയുന്നു. ഏകദേശം ഒരു മാസം മുമ്പ് ഇയാള് കുട്ടിയുടെ കൈ തല്ലിയൊടിച്ചിരുന്നതായും പരാതിയിലുണ്ട്. കുട്ടിയുടെ ശരീരത്തില് രണ്ട് ദിവസം മുമ്പുണ്ടായ മര്ദനത്തിന്റെ പാടുകള് ഇന്ക്വസ്റ്റ് ഘട്ടത്തില് തന്നെ കണ്ടെത്തിയിരുന്നു. ഇത് നേരത്തെയുള്ള ക്രൂരതകളുടെ തുടര്ച്ചയാണെന്നാണ് പോലീസിന്റെ നിഗമനം.
സംഭവത്തില് അമ്മയ്ക്കും രണ്ടാനച്ഛനുമെതിരെ കേസെടുത്ത പോലീസ്, നിലവില് നെടുമങ്ങാട് ഡിവൈ.എസ്.പിയുടെ നേരിട്ടുള്ള നേതൃത്വത്തിലാണ് ഇരുവരെയും വിശദമായി ചോദ്യം ചെയ്തുവരുന്നത്. ഇവരുടെ അറസ്റ്റ് ഉടന് രേഖപ്പെടുത്തുമെന്നാണ് സൂചന.
