കൊച്ചി: സിഎംആര്‍എല്‍ എക്‌സാലോജിക് സാമ്പത്തിക ഇടപാട് കേസില്‍ മുന്‍ മുഖ്യമന്ത്രി പിണറായി വിജയന്റെ മകള്‍ വീണ ടി. ഇന്ന് എന്‍ഫോഴ്സ്മെന്റ് ഡയറക്ടറേറ്റിന്റെ (ഇ.ഡി) കൊച്ചി ഓഫീസില്‍ ചോദ്യം ചെയ്യലിന് ഹാജരായി. ഭര്‍ത്താവ് പി.എ. മുഹമ്മദ് റിയാസിനും അഭിഭാഷകയ്‌ക്കുമൊപ്പമാണ് രാവിലെ 10.30ഓടെ കറുത്ത മാസ്‌ക് ധരിച്ച് വീണ എത്തിയത്. ഓഫീസിന് പരിസരത്ത് ശക്തമായ പോലീസ് സുരക്ഷയും ഏര്‍പ്പെടുത്തിയിരുന്നു.
വീണ വിജയന്റെ ഉടമസ്ഥതയിലുള്ള എക്‌സാലോജിക് കമ്പനിയും സിഎംആര്‍എല്‍ കമ്പനിയും തമ്മില്‍ നടന്നതായി ആരോപിക്കപ്പെടുന്ന സാമ്പത്തിക ഇടപാടുകളുമായി ബന്ധപ്പെട്ടാണ് ഇ.ഡിയുടെ അന്വേഷണം പുരോഗമിക്കുന്നത്. 2016 മുതല്‍ 2021 വരെയുള്ള കാലയളവില്‍ സിഎംആര്‍എല്ലില്‍ നിന്ന് 2.78 കോടി രൂപ വീണയ്‌ക്ക് ലഭിച്ചതായി അന്വേഷണ ഏജന്‍സി കണ്ടെത്തിയെന്നാണ് റിപ്പോര്‍ട്ടുകള്‍. ഈ ഇടപാടുകളുമായി ബന്ധപ്പെട്ട വിശദാംശങ്ങളാണ് ചോദ്യം ചെയ്യലില്‍ പ്രധാനമായും പരിശോധിക്കുന്നത്.
രേഖകള്‍ അഭിഭാഷകന്‍ മുഖേന സമര്‍പ്പിക്കാമെന്നും നേരിട്ട് ഹാജരാകാന്‍ കൂടുതല്‍ സമയം അനുവദിക്കണമെന്നുമുള്ള വീണയുടെ ആവശ്യം ഇ.ഡി അംഗീകരിച്ചില്ല. തുടര്‍ന്നാണ് അവര്‍ നേരിട്ട് ഹാജരായത്. സിഎംആര്‍എല്‍ മാനേജിംഗ് ഡയറക്ടര്‍ ശശിധരന്‍ കര്‍ത്ത ഉള്‍പ്പെടെ ഒന്‍പത് പേര്‍ക്കാണ് ആദ്യഘട്ടത്തില്‍ ഇ.ഡി നോട്ടീസ് നല്‍കിയിരിക്കുന്നത്. കഴിഞ്ഞ ദിവസങ്ങളില്‍ ശശിധരന്‍ കര്‍ത്തയുടെ ഭാര്യ ജയ കര്‍ത്ത, മകന്‍ ശരണ്‍ എസ്. കര്‍ത്ത, മകളും കമ്പനി ഡയറക്ടറുമായ ഷിബി എസ്. കര്‍ത്ത എന്നിവരെയും അന്വേഷണ സംഘം ചോദ്യം ചെയ്തിരുന്നു.
അതേസമയം, ആരോഗ്യപ്രശ്‌നങ്ങള്‍ ചൂണ്ടിക്കാട്ടി ശശിധരന്‍ കര്‍ത്ത സ്വന്തം ചോദ്യം ചെയ്യല്‍ മാറ്റിവെക്കാന്‍ ശ്രമിക്കുന്നതായും റിപ്പോര്‍ട്ടുകളുണ്ട്.
