ലഖ്നൗ: വരാനിരിക്കുന്ന മുഹറം, അന്താരാഷ്ട്ര യോഗാദിന ആഘോഷങ്ങൾ എന്നിവ സമാധാനപരമായി സംഘടിപ്പിക്കുന്നതിനായി കടുത്ത നിയന്ത്രണങ്ങളും മാർഗ്ഗനിർദ്ദേശങ്ങളും പുറപ്പെടുവിച്ച് ഉത്തർപ്രദേശ് സർക്കാർ. ഉന്നതതല യോഗത്തിന് ശേഷം മുഖ്യമന്ത്രി യോഗി ആദിത്യനാഥാണ് ഇത് സംബന്ധിച്ച നിർദ്ദേശങ്ങൾ ജില്ലാ ഭരണകൂടങ്ങൾക്ക് കൈമാറിയത്.
മുഹറം ആഘോഷങ്ങൾ പരിധിവിട്ട് ക്രമസമാധാന നില വഷളാകുന്നത് തടയുക എന്ന ലക്ഷ്യത്തോടെയാണ് സർക്കാർ കടുത്ത തീരുമാനങ്ങൾ കൈക്കൊണ്ടിട്ടുള്ളത്. മുഹറം പ്രമാണിച്ച് നടത്തുന്ന ആഘോഷങ്ങളിലോ ഘോഷയാത്രകളിലോ യാതൊരു കാരണവശാലും ആയുധങ്ങൾ പ്രദർശിപ്പിക്കരുതെന്ന് സർക്കാർ കർശനമായി നിർദ്ദേശിച്ചു. കൂടാതെ, ഉയർന്ന ശബ്ദത്തിലുള്ള ഡിജെ സംഗീത സംവിധാനങ്ങൾ ഉപയോഗിക്കാൻ പാടില്ല. മുഹറം ഘോഷയാത്രകളിൽ ഉപയോഗിക്കുന്ന തസിയകളുടെ (Tazia) ഉയരം നിശ്ചിത പരിധിയിൽ കവിയരുതെന്നും സർക്കാർ നിർദ്ദേശത്തിൽ വ്യക്തമാക്കുന്നുണ്ട്.
അതേസമയം, ജൂൺ 21-ലെ അന്താരാഷ്ട്ര യോഗാദിനത്തോട് അനുബന്ധിച്ച് വിപുലമായ പരിപാടികളാണ് സംസ്ഥാനത്ത് ആസൂത്രണം ചെയ്തിരിക്കുന്നത്. യുപിയിലെ 57,000-ത്തോളം ഗ്രാമപഞ്ചായത്തുകളിലും 762 നഗര കേന്ദ്രങ്ങളിലും യോഗാദിന പരിപാടികൾ സംഘടിപ്പിക്കും. യോഗാദിനാചരണത്തിന്റെ ഭാഗമായി ജൂൺ 20-ന് പ്രത്യേക ശുചീകരണ പരിപാടികളും നടത്താൻ തീരുമാനിച്ചിട്ടുണ്ട്. വിദ്യാലയങ്ങൾ, സർക്കാർ ഓഫീസുകൾ, പാർക്കുകൾ എന്നിവിടങ്ങളിലും വിവിധ യോഗാദിന പരിപാടികൾ അരങ്ങേറും.
ആഘോഷങ്ങൾ സൗഹാർദ്ദപരമായും സുരക്ഷിതമായും നടക്കുന്നുണ്ടെന്ന് ഉറപ്പുവരുത്താൻ പോലീസ് ഭരണകൂടങ്ങൾക്ക് സർക്കാർ പ്രത്യേക ജാഗ്രതാ നിർദ്ദേശം നൽകിയിട്ടുണ്ട്.
