ബെംഗളൂരു: ഇന്നലെ നടന്ന നീറ്റ്-യുജി 2026 പുനഃപരീക്ഷയ്‌ക്കിടെ ഹൃദയഭേദക ദൃശ്യങ്ങളാണ് ബെംഗളൂരുവിൽ നിന്ന് പുറത്തുവന്നത്. നഗരത്തിലെ പാലസ് റോഡിലുള്ള ഗവൺമെന്റ് രാമനാരായണ ചെല്ലാരം കോളേജിലെ പരീക്ഷാകേന്ദ്രത്തിന് പുറത്ത് പ്രവേശനം നിഷേധിക്കപ്പെട്ട വിദ്യാർത്ഥികൾ കണ്ണീരോടെ നിൽക്കുന്നതിന്റെ വീഡിയോകൾ സോഷ്യൽ മീഡിയയിൽ വൈറലായി.
കോൺഗ്രസ് റാലിയിൽ കുടുങ്ങി വൈകിയെത്തിയ വിദ്യാർത്ഥികൾക്ക് റിപ്പോർട്ടിംഗ് സമയപരിധി കഴിഞ്ഞതിനാൽ പരീക്ഷാകേന്ദ്രത്തിൽ പ്രവേശനം അനുവദിച്ചില്ല. ഒരു വീഡിയോയിൽ, പരീക്ഷ നഷ്ടമാകുമെന്ന ഭയത്തിൽ ഒരു വിദ്യാർത്ഥിനി അടഞ്ഞ ഗേറ്റ് കയറി അകത്ത് കടക്കാൻ ശ്രമിക്കുന്നതും കാണാം. വർഷങ്ങളായുള്ള കഠിനാധ്വാനവും സ്വപ്നങ്ങളും മിനിറ്റുകളുടെ വൈകല്യത്തിൽ തകർന്നുവീണ കാഴ്ചയായിരുന്നു അത്.
ഉച്ചയ്‌ക്ക് 2:00 മുതൽ 5:15 വരെ രാജ്യത്തുടനീളം കർശന സുരക്ഷാ ക്രമീകരണങ്ങളോടെയാണ് നീറ്റ്-യുജി പുനഃപരീക്ഷ നടന്നത്. ലക്ഷക്കണക്കിന് വിദ്യാർത്ഥികൾ പങ്കെടുത്ത ഈ നിർണായക പരീക്ഷയ്‌ക്കിടെയാണ് ബെംഗളൂരുവിൽ വലിയ വിവാദം പൊട്ടിപ്പുറപ്പെട്ടത്.
ഇന്ന് പാലസ് ഗ്രൗണ്ടിൽ നടന്ന കർണാടക പ്രദേശ് കോൺഗ്രസ് കമ്മിറ്റി പ്രസിഡന്റിന്റെ ചുമതലയേൽക്കൽ ചടങ്ങിനെ തുടർന്നുണ്ടായ കനത്ത ഗതാഗതക്കുരുക്കാണ് ചില വിദ്യാർത്ഥികൾക്ക് പരീക്ഷാകേന്ദ്രങ്ങളിൽ സമയത്ത് എത്താൻ തടസ്സമായതെന്നാണ് ആരോപണം. പരീക്ഷാദിവസം തന്നെ നഗരമധ്യത്തിൽ വൻ രാഷ്‌ട്രീയ സമ്മേളനം സംഘടിപ്പിച്ചത് ഭരണകൂടത്തിന്റെ മുൻഗണനകളെ ചോദ്യം ചെയ്യുന്നതായി വിമർശകർ ചൂണ്ടിക്കാട്ടുന്നു.
ബിജെപി നേതാവ് ബി വൈ വിജയേന്ദ്ര കോൺഗ്രസ് സർക്കാരിനെ രൂക്ഷമായി വിമർശിച്ചു. “ഇന്ന് ആയിരക്കണക്കിന് വിദ്യാർത്ഥികൾ നീറ്റ് പരീക്ഷ എഴുതുന്നുണ്ടെന്ന് പൊതുജനങ്ങൾക്ക് അറിയാവുന്ന കാര്യമായിരുന്നു. എന്നിട്ടും പാലസ് ഗ്രൗണ്ടിൽ കെപിസിസി പ്രസിഡന്റിന്റെ സത്യപ്രതിജ്ഞാ ചടങ്ങ് സംഘടിപ്പിച്ചു. അതുമൂലം ബെംഗളൂരുവിൽ എത്ര വലിയ ഗതാഗതക്കുരുക്ക് ഉണ്ടാകുമെന്ന് കോൺഗ്രസിന് നന്നായി അറിയാമായിരുന്നു,” അദ്ദേഹം പറഞ്ഞു.
വിദ്യാർത്ഥികളുടെ ഭാവിയെക്കാൾ രാഷ്‌ട്രീയ ശക്തിപ്രകടനത്തിനാണ് കോൺഗ്രസ് മുൻഗണന നൽകിയതെന്ന് വിജയേന്ദ്ര ആരോപിച്ചു. “ആഴ്ചകളായി വിദ്യാർത്ഥികളുടെയും പരീക്ഷാ വിഷയങ്ങളുടെയും പേരിൽ രാഷ്‌ട്രീയം കളിച്ചവർ, യഥാർത്ഥത്തിൽ വിദ്യാർത്ഥികൾക്ക് പിന്തുണ ആവശ്യമുള്ള സമയത്ത് ഉത്തരവാദിത്വം പോലും കാണിച്ചില്ല,” എന്നും അദ്ദേഹം വിമർശിച്ചു.
ഈ ട്രാഫിക് കുരുക്ക് കാരണം നിരവധി വിദ്യാർത്ഥികൾക്ക് പരീക്ഷ എഴുതാൻ സാധിച്ചില്ലെന്ന റിപ്പോർട്ടുകളും പുറത്തുവന്നിട്ടുണ്ട്. “കോൺഗ്രസിന്റെ യഥാർത്ഥ മുഖമാണ് ഇന്ന് പുറത്തുവന്നത്. വിദ്യാർത്ഥികൾക്ക് സൗകര്യമുള്ളപ്പോൾ അവരെ ഉപയോഗിക്കുകയും, അസൗകര്യമുണ്ടാകുമ്പോൾ അവഗണിക്കുകയും ചെയ്യുന്ന സമീപനമാണ് അവർ കാണിച്ചത്,” എന്നും വിജയേന്ദ്ര കുറ്റപ്പെടുത്തി.
ഒരു പരീക്ഷ നഷ്ടപ്പെടുന്നത് ഒരു ദിവസം നഷ്ടപ്പെടുന്നതല്ല — ചിലർക്കത് ഒരു വർഷം, ചിലർക്കത് ജീവിതത്തിലെ ഏറ്റവും വലിയ അവസരമാണ്. പരീക്ഷയുടെ ഗൗരവം അറിയാമായിരുന്നിട്ടും ട്രാഫിക് നിയന്ത്രണം പോലും ഉറപ്പാക്കാൻ സാധിക്കാത്തത് കോൺഗ്രസ് സർക്കാരിന്റെ ഗുരുതര ഭരണപരമായ വീഴ്ചയാണെന്ന വിമർശനം ശക്തമാകുകയാണ്.
രാഷ്‌ട്രീയ റാലികൾക്കും ശക്തിപ്രകടനങ്ങൾക്കും സമയം കണ്ടെത്തുന്ന ഭരണകൂടം, വിദ്യാർത്ഥികളുടെ ഭാവി സംരക്ഷിക്കാൻ എന്തുകൊണ്ട് തയ്യാറായില്ല? ബെംഗളൂരു ഉയർത്തുന്ന ഈ ചോദ്യം രാജ്യത്താകമാനം ചര്‍ച്ചയാകുകയാണ്.
