സൂര്യയും മമിതാ ബൈജുവും കേന്ദ്ര കഥാപാത്രങ്ങളാകുന്ന ‘വിശ്വനാഥൻ ആൻ്റ് സൺസ്’ എന്ന ചിത്രം ആഗസ്റ്റ് പതിന്നാലിന് തിയേറ്ററുകളിൽ എത്തുന്നു. ‘ലക്കി ഭാസ്കർ’ എന്ന സൂപ്പർഹിറ്റ് ചിത്രത്തിന് ശേഷം പ്രശസ്ത തെലുങ്ക് സംവിധായകൻ വെങ്കി അറ്റ്ലൂരി ഒരുക്കുന്ന സിനിമയാണിത്. ഏറെ ശ്രദ്ധിക്കപ്പെട്ട ‘കറുപ്പ്’ എന്ന ചിത്രത്തിന് ശേഷം പുറത്തിറങ്ങുന്ന സൂര്യയുടെ 46-ാമത് ചിത്രമെന്ന പ്രത്യേകതയും ഇതിനുണ്ട്. ‘പ്രേമലു’വിലൂടെ പ്രേക്ഷകരുടെ പ്രിയങ്കരിയായി മാറിയ മമിതാ ബൈജു നായികയായി എത്തുന്നു എന്നത് യുവാക്കൾക്കിടയിൽ വലിയ പ്രതീക്ഷയാണ് നൽകുന്നത്.
ഒരു പക്കാ ഫാമിലി എന്റർടൈനറായി ഒരുങ്ങുന്ന ഈ ബിഗ് ബഡ്ജറ്റ് ചിത്രം സിതാര എന്റർടൈൻമെന്റ്സും ഫോർച്യൂൺ ഫോർ സിനിമാസും ചേർന്നാണ് നിർമ്മിക്കുന്നത്. സൂര്യദേവര നാഗ വംശി, സായ് സൗജന്യ എന്നിവർ ചേർന്നാണ് നിർമ്മാണം. ‘വിജയ് സൂപ്പറും പൗർണ്ണമിയും’ എന്ന വിജയചിത്രത്തിന് ശേഷം ന്യൂ സൂര്യ ഫിലിംസ് ആണ് ഈ ചിത്രം കേരളത്തിൽ പ്രദർശനത്തിന് എത്തിക്കുന്നത്.
മനോഹരമായ ലൊക്കേഷനുകളും മികച്ച ആക്ഷൻ രംഗങ്ങളും ചിത്രത്തിന്റെ പ്രധാന ആകർഷണങ്ങളാണ്. ദേശീയ പുരസ്കാര ജേതാവ് ജി.വി. പ്രകാശ് കുമാർ സംഗീതവും, നിമിഷ് രവി ഛായാഗ്രഹണവും നിർവ്വഹിക്കുന്നു. ചിത്രത്തിലെ സൂര്യയും മമിതയും ഒന്നിച്ചുള്ള “പട്ടാമ്പൂച്ചി” എന്ന പ്രണയഗാനത്തിന്റെ പ്രൊമോ വീഡിയോ ഇതിനകം തന്നെ സോഷ്യൽ മീഡിയയിൽ തരംഗമായിക്കഴിഞ്ഞു. വിജയ് ബിന്നി നൃത്തസംവിധാനം ചെയ്ത ഈ ഗാനത്തിൽ മമിതയുടെ മനോഹരമായ നൃത്തമാണ് ഹൈലൈറ്റ്. രവീണ ടണ്ഡൻ, രാധിക ശരത്കുമാർ, ഭവാനി ശ്രീ തുടങ്ങിയ പ്രമുഖ താരങ്ങളും ചിത്രത്തിൽ അണിനിരക്കുന്നുണ്ട്.
