നാഗ്പുര്‍: പുതിയ തലമുറയില്‍ വര്‍ധിച്ചുവരുന്ന ഏകാന്തതയും മാനസിക അസ്ഥിരതയും തടയാന്‍ കുടുംബത്തിനുള്ളിലെ ആശയവിനിമയം ശക്തിപ്പെടുത്തേണ്ടത് അനിവാര്യമാണെന്ന് ആര്‍എസ്എസ് സര്‍സംഘചാലക് ഡോ. മോഹന്‍ ഭാഗവത്. കുട്ടി കരയുമ്പോള്‍ അവനെ സമാധാനിപ്പിക്കേണ്ടത് മൊബൈല്‍ ഫോണ്‍ കൈമാറിയല്ല, മറിച്ച് സ്‌നേഹപൂര്‍വമായ ആശയവിനിമയത്തിലൂടെയാണെന്നും അദ്ദേഹം പറഞ്ഞു. നാഗ്പൂരിലെ സമര്‍പ്പണ്‍ വെല്‍നസ് സെന്ററിന്റെ ഉദ്ഘാടനച്ചടങ്ങില്‍ സംസാരിക്കുകയായിരുന്നു അദ്ദേഹം.
മുന്‍കാലങ്ങളില്‍ കുടുംബാംഗങ്ങള്‍ ഒരുമിച്ചിരുന്ന് നാമസങ്കീര്‍ത്തനം നടത്തുകയും കഥകള്‍ പറയുകയും ചെയ്തിരുന്ന പാരമ്പര്യമാണ് തലമുറകള്‍ക്ക് മാനസിക കരുത്ത് നല്‍കിയത്. എന്നാല്‍ ഇന്ന് ചെറിയ തിരിച്ചടികള്‍ പോലും കുട്ടികളെ മാനസികമായി തളര്‍ത്തുന്ന സാഹചര്യമാണുള്ളതെന്ന് അദ്ദേഹം ചൂണ്ടിക്കാട്ടി. പന്ത്രണ്ടാം ക്ലാസ് ഉള്‍പ്പെടെയുള്ള പരീക്ഷകളില്‍ പരാജയപ്പെടുന്ന കുട്ടികള്‍ ശകാരത്തെ ഭയന്ന് ജീവനൊടുക്കുന്ന സംഭവങ്ങള്‍ റിപ്പോര്‍ട്ട് ചെയ്യപ്പെടുന്നുണ്ടെന്ന് പറഞ്ഞ അദ്ദേഹം, ചെറിയ പ്രശ്‌നങ്ങള്‍ പോലും നേരിടാന്‍ കഴിയാത്ത അവസ്ഥയിലേക്കാണ് പുതിയ തലമുറ നീങ്ങുന്നതെന്നും അഭിപ്രായപ്പെട്ടു.
മുത്തശ്ശിക്കഥകള്‍ നല്‍കിയ ആത്മവിശ്വാസവും കൂട്ടുകുടുംബങ്ങള്‍ സമ്മാനിച്ച അടുപ്പവും ഇന്നത്തെ കുട്ടികള്‍ക്ക് നഷ്ടമായിരിക്കുകയാണ്. അച്ഛനമ്മമാര്‍ കുട്ടികളെ ടെലിവിഷനോ ‘ഗൂഗിള്‍ ബാബ’യുടെയോ ആശ്രയത്തിലേക്ക് വിട്ടുകൊടുക്കുന്നത് അപകടകരമായ പ്രവണതയാണെന്നും അദ്ദേഹം പറഞ്ഞു. ജീവിതത്തിലെ വെല്ലുവിളികളെ ധൈര്യത്തോടെ നേരിടാന്‍ കഴിയുന്ന മനസ്സ് കുട്ടികളിലും യുവാക്കളിലും വളര്‍ത്തിയെടുക്കേണ്ടത് അനിവാര്യമാണെന്ന് അദ്ദേഹം പറഞ്ഞു. ഇതിനായി കുടുംബവും സമൂഹവും ഒരുമിച്ച് പ്രവര്‍ത്തിക്കണമെന്നും കുട്ടികളും യുവാക്കളും അനുഭവിക്കുന്ന ഒറ്റപ്പെടല്‍ അവസാനിപ്പിക്കാന്‍ കൂട്ടായ ശ്രമങ്ങള്‍ വേണമെന്നും അദ്ദേഹം ആവശ്യപ്പെട്ടു.
ശരീരത്തിന്റെ ആരോഗ്യം പോലെ തന്നെ മാനസികാരോഗ്യത്തിനും പ്രാധാന്യമുണ്ടെന്ന് ചൂണ്ടിക്കാട്ടിയ മോഹന്‍ ഭാഗവത്, ആരോഗ്യമില്ലാത്ത ശരീരം മനസിനെയും ദുര്‍ബലമാക്കുമെന്ന് പറഞ്ഞു. മനസ്സാണ് മനുഷ്യനെ ബന്ധനത്തിലാക്കുന്നതും മോചിപ്പിക്കുന്നതും. ജനനത്തോടൊപ്പം മനസിന്റെ വളര്‍ച്ചയും ആരംഭിക്കുന്നുവെന്നും ജീവിതാനുഭവങ്ങളാണ് മനസ്സിനെ രൂപപ്പെടുത്തുന്നതെന്നും അദ്ദേഹം വിശദീകരിച്ചു.
പോസിറ്റീവായ അനുഭവങ്ങള്‍ ക്രിയാത്മകമായ ജീവിതം സമ്മാനിക്കുമ്പോള്‍ നെഗറ്റീവ് ചിന്തകള്‍ മനസ്സിനെ ദുര്‍ബലമാക്കുമെന്ന് അദ്ദേഹം പറഞ്ഞു. മനുഷ്യന്റെ വികാസയാത്രയില്‍ തുടക്കം മുതല്‍ അവസാനം വരെ മനസിന് നിര്‍ണായക പങ്കുണ്ടെന്നും മാനസികാരോഗ്യത്തെക്കുറിച്ചുള്ള പഠനത്തില്‍ ഭാരതത്തിന് സമ്പന്നമായ പാരമ്പര്യമുണ്ടെന്നും അത് കൂടുതല്‍ പഠനവിഷയമാക്കണമെന്നും മോഹന്‍ ഭാഗവത് അഭിപ്രായപ്പെട്ടു.
