തൃശ്ശൂര്‍: ഗുരുവായൂര്‍ ശ്രീകൃഷ്ണ ക്ഷേത്രത്തില്‍ വെര്‍ച്വല്‍ ക്യൂ സംവിധാനത്തിലൂടെയുള്ള ദര്‍ശനത്തിന് തുടക്കമായി. രാവിലെ 7 മുതല്‍ 8 വരെയുള്ള ആദ്യ സ്ലോട്ടില്‍ 148 ഭക്തരാണ് ദര്‍ശനം നടത്തിയത്. ഒരു സ്ലോട്ടില്‍ 300 പേര്‍ക്ക് വരെ ദര്‍ശനം അനുവദിക്കാമെന്നിരിക്കെ ആദ്യ മണിക്കൂറില്‍ പകുതിയോളം പേര്‍ മാത്രമാണ് എത്തിയത്.
ആദ്യ സ്ലോട്ടിലെത്തിയ ഭക്തികള്‍ക്ക് പത്ത് മിനിറ്റിനുള്ളില്‍ തന്നെ ദര്‍ശനം പൂര്‍ത്തിയാക്കാനായതായി ദേവസ്വം അധികൃതര്‍ അറിയിച്ചു. രാവിലെ 8 മുതല്‍ 9 വരെ നിശ്ചയിച്ചിരുന്ന രണ്ടാം സ്ലോട്ടിലേക്ക് ബുക്ക് ചെയ്തവരില്‍ നേരത്തെയെത്തിയവരെ ഏഴരയോടെ ക്യൂ പന്തലിലേക്ക് പ്രവേശിപ്പിക്കുകയും ചെയ്തു. വെര്‍ച്വല്‍ ക്യൂ സംവിധാനം വഴി തടസങ്ങളില്ലാതെ സുഗമമായ ദര്‍ശനം ലഭിച്ചതായി ഭക്തര്‍ പ്രതികരിച്ചു.
ചൊവ്വാഴ്ച രാവിലെ 6.45ന് ദേവസ്വം ചെയര്‍മാന്‍ എ.വി. ഗോപിനാഥന്‍ വെര്‍ച്വല്‍ ദര്‍ശന സംവിധാനത്തിന്റെ ഉദ്ഘാടനം നിര്‍വഹിച്ചു. ദേവസ്വം മാനേജര്‍മാരായ സി.വി. സന്തോഷ്, എ.വി. പ്രശാന്ത്, സുഭാഷ് എന്നിവര്‍ ചടങ്ങില്‍ പങ്കെടുത്തു.
