സാന്റിയാഗോ: 2026 ഫിഫ ലോകകപ്പിലെ തകര്പ്പന് പ്രകടനങ്ങളിലൂടെ ലോകശ്രദ്ധ നേടിയ കേപ് വെര്ദെ ഗോള്കീപ്പര് വോസിഞ്ഞ ചിലിയുടെ പ്രമുഖ ക്ലബായ കോളോ കോളോയില് ചേര്ന്നു. നിരവധി വന് ക്ലബുകളില് നിന്ന് ഓഫറുകള് ലഭിച്ചിരുന്നെങ്കിലും ആദ്യം സമീപിച്ച കോളോ കോളോയ്ക്കാണ് മുന്ഗണന നല്കിയതെന്ന് താരം വ്യക്തമാക്കി.
ഞായറാഴ്ച സാന്റിയാഗോ വിമാനത്താവളത്തിലെത്തിയ വോസിഞ്ഞയ്ക്ക് കോളോ കോളോ ആരാധകര് വന് സ്വീകരണമാണ് ഒരുക്കിയത്. തിങ്കളാഴ്ച വൈദ്യപരിശോധന പൂര്ത്തിയാക്കിയ താരം ക്ലബുമായി ഔദ്യോഗിക കരാറില് ഒപ്പുവെച്ചു. ചൊവ്വാഴ്ച പുതിയ ടീമിനൊപ്പമുള്ള ആദ്യ പരിശീലനവും ആരംഭിച്ചു.
സ്പെയിന്, ഉറുഗ്വായ്, അര്ജന്റീന തുടങ്ങിയ കരുത്തരായ ടീമുകള്ക്കെതിരെ നടത്തിയ അസാമാന്യ സേവുകളാണ് 40-കാരനായ വോസിഞ്ഞയെ ലോക ഫുട്ബോളിലെ ശ്രദ്ധാകേന്ദ്രമാക്കിയത്. ലോകകപ്പിലെ മിന്നുന്ന പ്രകടനത്തിന് പിന്നാലെ ഫിഫയുടെ ടൂര്ണമെന്റിലെ മികച്ച ഇലവനിലും താരം ഇടംപിടിച്ചിരുന്നു. ലോകകപ്പിന് ശേഷം വോസിഞ്ഞയുടെ വിപണി മൂല്യം വന്തോതില് ഉയര്ന്നു. യൂറോപ്പിലെയും ദക്ഷിണ അമേരിക്കയിലെയും നിരവധി ക്ലബുകള് താരത്തിനായി രംഗത്തെത്തിയിരുന്നുവെന്നാണ് റിപ്പോര്ട്ടുകള്.
സമൂഹമാധ്യമങ്ങളിലും വോസിഞ്ഞയ്ക്ക് വലിയ ജനപ്രീതിയാണ് ലഭിച്ചത്. ലോകകപ്പിന് മുമ്പ് ഏകദേശം 50,000 മാത്രമായിരുന്ന ഇന്സ്റ്റഗ്രാം ഫോളോവേഴ്സ് എണ്ണം ടൂര്ണമെന്റിന് ശേഷം മൂന്ന് കോടിയിലേക്ക് ഉയര്ന്നതും താരത്തിന്റെ ജനപ്രീതിയുടെ തെളിവായി. കോളോ കോളോയുടെ ഗോള്വല കാക്കാന് വോസിഞ്ഞ എത്തുന്നതോടെ ചിലിയന് ലീഗിലും ക്ലബിന്റെ അന്താരാഷ്ട്ര മത്സരങ്ങളിലും വലിയ പ്രതീക്ഷയാണ് ആരാധകര് വെച്ചുപുലര്ത്തുന്നത്.
