തിരുവനന്തപുരം: സോഷ്യല് മീഡിയയിലെ വിവിധ പോസ്റ്റുകള് നീക്കം ചെയ്യപ്പെട്ടത് എഐ അപ്ഗ്രഡേഷനിടെ സംഭവിച്ച സാങ്കേതിക പിഴവാണെന്ന് മെറ്റ. പ്രശ്നം പരിഹരിച്ചതായും നീക്കം ചെയ്ത ഉള്ളടക്കങ്ങള് പുനഃസ്ഥാപിച്ചതായും മെറ്റ കേരള പൊലീസിന്റെ സൈബര് വിഭാഗത്തെ അറിയിച്ചു.
ഉള്ളടക്കങ്ങള് നീക്കം ചെയ്തത് ആരുടെയും നിര്ദേശപ്രകാരമല്ലെന്ന് മെറ്റയുടെ ഇന്ത്യന് നോഡല് ഓഫീസര് നല്കിയ വിശദീകരണത്തില് വ്യക്തമാക്കി. കേരളത്തില് മാത്രമല്ല, രാജ്യത്തെ വിവിധ സംസ്ഥാനങ്ങളിലും സമാന രീതിയില് പോസ്റ്റുകള് നീക്കം ചെയ്യപ്പെട്ടിട്ടുണ്ടെന്നും മെറ്റ അറിയിച്ചു.
മാധ്യമ സ്ഥാപനങ്ങളുടെയും മറ്റും സോഷ്യല് മീഡിയ പോസ്റ്റുകള് നീക്കം ചെയ്യപ്പെട്ടതിന് പിന്നാലെ പിണറായി വിജയനും സംസ്ഥാന സര്ക്കാരിനുമെതിരെ ഉള്പ്പെടെ വിമര്ശനങ്ങള് ഉയര്ന്നിരുന്നു. ഇതിന് പിന്നാലെയാണ് കേരള പൊലീസിന്റെ സൈബര് ഓപ്പറേഷന് വിഭാഗം മെറ്റയോട് അടിയന്തര വിശദീകരണം തേടിയത്. പിഴവ് പരിഹരിച്ച സാഹചര്യത്തില് നീക്കം ചെയ്യപ്പെട്ട ഉള്ളടക്കങ്ങള് പുനഃസ്ഥാപിച്ചതായാണ് മെറ്റയുടെ വിശദീകരണം.
