ബാഴ്‌സലോണ: ഫുട്‌ബോള്‍ ട്രാന്‍സ്ഫര്‍ വിപണിയില്‍ വമ്പന്‍ നീക്കവുമായി ബാഴ്‌സലോണ. മാഞ്ചസ്റ്റര്‍ സിറ്റിയുടെ സ്പാനിഷ് മിഡ്ഫീല്‍ഡര്‍ റോഡ്രിയെ 65 ദശലക്ഷം പൗണ്ടിന് (ഏകദേശം 700 കോടി രൂപ) സ്വന്തമാക്കാന്‍ ലാ ലിഗ ചാമ്പ്യന്മാര്‍ ധാരണയിലെത്തിയതായി റിപ്പോര്‍ട്ട്. 30കാരനായ റോഡ്രി ബാഴ്‌സലോണയുമായി നാല് വര്‍ഷത്തെ കരാറില്‍ ഒപ്പുവയ്‌ക്കും. ട്രാന്‍സ്ഫര്‍ നടപടികള്‍ അടുത്ത ദിവസങ്ങളില്‍ പൂര്‍ത്തിയാകുമെന്നാണ് വിവരം.
റോഡ്രിക്കായി റയല്‍ മാഡ്രിഡും രംഗത്തുണ്ടായിരുന്നെങ്കിലും അവസാന ഘട്ടത്തിലെ നീക്കങ്ങളിലൂടെ ബാഴ്‌സലോണ കരാര്‍ ഉറപ്പിക്കുകയായിരുന്നു. സിറ്റിയുമായുള്ള കരാര്‍ അവസാന വര്‍ഷത്തിലേക്ക് കടക്കുന്നതിനിടെയാണ് താരത്തിന്റെ സ്‌പെയിനിലേക്കുള്ള മടക്കം. നേരത്തെ ബാഴ്‌സലോണ മുന്നോട്ടുവച്ച 38.5 ദശലക്ഷം പൗണ്ടിന്റെ പ്രാഥമിക ഓഫര്‍ സിറ്റി നിരസിച്ചിരുന്നു.
2019ല്‍ അത്‌ലറ്റിക്കോ മാഡ്രിഡില്‍നിന്നാണ് റോഡ്രി മാഞ്ചസ്റ്റര്‍ സിറ്റിയിലെത്തിയത്. സിറ്റിക്കായി 298 മത്സരങ്ങള്‍ കളിച്ച താരം നാല് പ്രീമിയര്‍ ലീഗ് കിരീടങ്ങളും ഒരു ചാമ്പ്യന്‍സ് ലീഗ് കിരീടവും ഉള്‍പ്പെടെ 12 പ്രധാന ട്രോഫികള്‍ സ്വന്തമാക്കുന്നതില്‍ നിര്‍ണായക പങ്കുവഹിച്ചു. 2024ല്‍ ബാലണ്‍ ഡി ഓര്‍ പുരസ്‌കാരവും നേടി. ലോകകപ്പിലും സ്‌പെയിനിനായി മികച്ച പ്രകടനം കാഴ്ചവെച്ച റോഡ്രി ടൂര്‍ണമെന്റിലെ മികച്ച താരത്തിനുള്ള പുരസ്‌കാരവും സ്വന്തമാക്കിയിരുന്നു.
റോഡ്രിയുടെ വിടവ് നികത്താന്‍ ലില്ലെയുടെ 18കാരനായ മൊറോക്കന്‍ താരം അയൂബ് ബോവാഡിയെ സ്വന്തമാക്കാനാണ് സിറ്റി പരിശീലകന്‍ എന്‍സോ മരെസ്‌കയുടെ നീക്കമെന്നാണ് റിപ്പോര്‍ട്ട്. ഏകദേശം 85 ദശലക്ഷം പൗണ്ടാണ് താരത്തിന്റെ വില കണക്കാക്കുന്നത്. ഇതിന് പുറമെ ചെല്‍സിയുടെ അര്‍ജന്റീനിയന്‍ മിഡ്ഫീല്‍ഡര്‍ എന്‍സോ ഫെര്‍ണാണ്ടസ്, ബോണ്‍മൗത്തിന്റെ യുവതാരം അലക്‌സ് സ്‌കോട്ട്, ലിവര്‍പൂളിന്റെ അലക്‌സിസ് മക് അലിസ്റ്റര്‍ എന്നിവരെയും ടീമിലെത്തിക്കാന്‍ സിറ്റി ശ്രമിക്കുന്നുണ്ട്. നോട്ടിങ്ഹാം ഫോറസ്റ്റില്‍നിന്ന് എലിയറ്റ് ആന്‍ഡേഴ്‌സണെ നേരത്തെ തന്നെ സിറ്റി സ്വന്തമാക്കിയിരുന്നു.
