ഇടുക്കി: കുടുംബപ്രശ്നത്തെ തുടര്ന്ന് ജീവനൊടുക്കാന് ശ്രമിച്ച മധ്യവയസ്കനെ അനുനയിപ്പിച്ച് പൊലീസ് ജീവിതത്തിലേക്ക് തിരികെ കൊണ്ടുവന്നു. ഇടുക്കി പൊലീസ് സ്റ്റേഷന് പരിധിയിലാണ് സംഭവം. ഗൃഹനാഥന് മുറിക്കുള്ളില് കയറി ജീവനൊടുക്കാന് ശ്രമിക്കുന്നതായി ഇളയമകള് പൊലീസ് കണ്ട്രോള് റൂമില് വിവരം അറിയിക്കുകയായിരുന്നു. തുടര്ന്ന് ഇടുക്കി പൊലീസ് സ്റ്റേഷനിലെ സബ് ഇന്സ്പെക്ടര് ബിബിനും സഹപ്രവര്ത്തകരും ഉടന് സ്ഥലത്തെത്തി.
മുറിക്കുള്ളില് കഴിയുകയായിരുന്നയാളുമായി പൊലീസ് ഉദ്യോഗസ്ഥര് ജനലിലൂടെ സംസാരിച്ച് കാര്യങ്ങള് മനസിലാക്കാന് ശ്രമിച്ചു. ഏകദേശം ഒരു മണിക്കൂറോളം നീണ്ട സംഭാഷണത്തിനൊടുവില് ഉദ്യോഗസ്ഥര് അദ്ദേഹത്തെ അനുനയിപ്പിച്ച് അപകടകരമായ സാഹചര്യം ഒഴിവാക്കുകയായിരുന്നു. തുടര്ന്ന് പൊലീസ് ഉദ്യോഗസ്ഥര് മുറിക്കുള്ളിലെത്തി കുടുംബനാഥനുമായി വീണ്ടും സംസാരിച്ചു. കുടുംബപ്രശ്നങ്ങള് സംബന്ധിച്ച വിവരങ്ങള് ചോദിച്ചറിഞ്ഞ ഉദ്യോഗസ്ഥര് ആവശ്യമായ സഹായം ഉറപ്പുനല്കുകയും ചെയ്തു.
സംഭവസമയത്തെ പൊലീസ് ഇടപെടലിന്റെ ദൃശ്യങ്ങള് സമൂഹമാധ്യമങ്ങളില് പ്രചരിക്കുന്നുണ്ട്. പ്രതിസന്ധി ഘട്ടത്തില് പൊലീസ് ഉദ്യോഗസ്ഥര് നടത്തിയ സമയോചിതമായ ഇടപെടലിന് നിരവധി പേരാണ് അഭിനന്ദനം അറിയിക്കുന്നത്. എറണാകുളം വടക്കന് പറവൂര് സ്വദേശിയായ എസ്ഐ ബിബിന് ഒരാഴ്ച മുമ്പാണ് ഇടുക്കി പൊലീസ് സ്റ്റേഷനില് ചുമതലയേറ്റത്.
