കൊച്ചി: പൊതുജനങ്ങളുടെ സുരക്ഷയ്ക്ക് ആവശ്യമായ മുന്ഗണന നല്കാതെയാണ് സംസ്ഥാനത്ത് പല കാര്യങ്ങളും നടപ്പാക്കുന്നതെന്ന് ഹൈക്കോടതി ഡിവിഷന് ബെഞ്ചിന്റെ വിമര്ശനം. ജനങ്ങളുടെ ജീവനും സുരക്ഷയ്ക്കും ഭീഷണിയാകുന്ന വിഷയങ്ങള് മോട്ടോര് വാഹന വകുപ്പും സര്ക്കാരും കര്ശനമായി പരിശോധിക്കണമെന്നും കോടതി നിര്ദേശിച്ചു. ദേശീയപാതകളിലുണ്ടാകുന്ന തുടര്ച്ചയായ അപകടങ്ങളും വാഹനങ്ങളില് നടത്തുന്ന നിയമവിരുദ്ധ മോഡിഫിക്കേഷനുകളും പരിഗണിച്ചാണ് ഹൈക്കോടതി സ്വമേധയാ കേസെടുത്തത്. കേസില് വാഹനങ്ങളുടെ ഘടനയില് വരുത്തുന്ന മാറ്റങ്ങള് ഉള്പ്പെടെയുള്ള വിഷയങ്ങള് കോടതി പരിശോധിച്ചു.
ഓഫ് റോഡ് ആവശ്യങ്ങള്ക്കെന്ന പേരില് ജീപ്പുകളില് വലിയ ടയറുകള് ഘടിപ്പിക്കുന്നത് അപകടങ്ങള്ക്ക് കാരണമാകുന്നുണ്ടെന്ന് കോടതി ചൂണ്ടിക്കാട്ടി. വാഹനത്തിന്റെ അടിസ്ഥാന ഘടനയില് വരുത്തുന്ന മാറ്റങ്ങള് ഡ്രൈവര്മാര്ക്ക് വാഹനത്തിന്റെ നിയന്ത്രണം നഷ്ടപ്പെടുന്നതിനും വഴിയാത്രക്കാരുടെയും മറ്റ് വാഹനങ്ങളുടെയും സുരക്ഷ അപകടത്തിലാക്കുന്നതിനും ഇടയാക്കാമെന്നും കോടതി നിരീക്ഷിച്ചു. ജനങ്ങളുടെ സുരക്ഷ ഉറപ്പാക്കുന്നതില് യാതൊരു വിട്ടുവീഴ്ചയും പാടില്ലെന്ന് കോടതി വ്യക്തമാക്കി. റോഡ് സുരക്ഷാ നിയമങ്ങളും വാഹനങ്ങളില് അനുവദനീയമായ മാറ്റങ്ങള് സംബന്ധിച്ച ചട്ടങ്ങളും കര്ശനമായി പാലിക്കുന്നുണ്ടെന്ന് സര്ക്കാര്, മോട്ടോര് വാഹന വകുപ്പ് അധികൃതര് ഉറപ്പാക്കണമെന്നും ഹൈക്കോടതി നിര്ദേശിച്ചു.
