കൊച്ചി: എറണാകുളം ജില്ലയിലെ മരട്, കളമശേരി ഇലക്ട്രിക്കല് സെക്ഷനുകളുടെ പരിധിയില് 3.14 കോടി രൂപയുടെ വൈദ്യുതി ദുരുപയോഗ ക്രമക്കേട് കണ്ടെത്തി. കെഎസ്ഇബി ആന്റി പവര് തെഫ്റ്റ് സ്ക്വാഡ് കൊല്ലം യൂണിറ്റ് നടത്തിയ പരിശോധനയിലാണ് വന് ക്രമക്കേടുകള് കണ്ടെത്തിയത്. ചീഫ് വിജിലന്സ് ഓഫീസറുടെ നിര്ദേശപ്രകാരമായിരുന്നു പരിശോധന. മരട് സെക്ഷനില് അനുവദിച്ചതിലും 260 കിലോവാട്ട് അധിക ലോഡ് ഉപയോഗിക്കുന്നതായി കണ്ടെത്തി. മരട് സെക്ഷന്റെ പരിധിയില് 50 കിലോവാട്ട് കണക്ടഡ് ലോഡിന് മാത്രം അനുമതിയുണ്ടായിരുന്ന ഒരു ഹൈ ടെന്ഷന് ഉപഭോക്താവിന്റെ കണക്ഷനിലാണ് 260 കിലോവാട്ട് അനധികൃത ലോഡ് ഘടിപ്പിച്ച് വൈദ്യുതി ഉപയോഗിച്ചതായി കണ്ടെത്തിയത്.
ഇതേ കണക്ഷനില് നിന്ന് 145 കടമുറികളിലേക്ക് അനുമതിയില്ലാതെ വൈദ്യുതി വിതരണം ചെയ്തതായും പരിശോധനയില് കണ്ടെത്തി. കെഎസ്ഇബിയുടെ മീറ്ററിലൂടെയല്ലാതെ വൈദ്യുതി വിതരണം നടത്തിയതായാണ് കണ്ടെത്തല്. കളമശേരി ഇലക്ട്രിക്കല് സെക്ഷന്റെ പരിധിയിലും വലിയ ക്രമക്കേട് കണ്ടെത്തി. വ്യാവസായിക ആവശ്യത്തിനായി 450 കിലോവാട്ട് കണക്ടഡ് ലോഡിന് അനുമതിയുണ്ടായിരുന്ന കണക്ഷനില് 850 കിലോവാട്ട് അധിക ലോഡ് സ്ഥാപിച്ച് പ്രവര്ത്തിക്കുന്നതായി പരിശോധനയില് കണ്ടെത്തി. ഇതിന് പുറമെ കെഎസ്ഇബിയുടെ അനുമതിയില്ലാതെ എയര്ടെല്, ബിഎസ്എന്എല് എന്നിവയുടെ മൊബൈല് ടവറുകളിലേക്കും വൈദ്യുതി വിതരണം ചെയ്തിരുന്നതായും കണ്ടെത്തിയിട്ടുണ്ട്.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
കെഎസ്ഇബിയുടെ പ്രത്യേക പരിശോധനാ ഡ്രൈവിന്റെ ഭാഗമായി നടത്തിയ പരിശോധനയിലാണ് മരടിലും കളമശേരിയിലുമായി വൈദ്യുതി ദുരുപയോഗം കണ്ടെത്തിയത്. APTS കൊല്ലം യൂണിറ്റിന്റെ പരിശോധനയില് ആകെ 3.14 കോടി രൂപയുടെ വൈദ്യുതി ക്രമക്കേടാണ് കണ്ടെത്തിയത്.
