ന്യൂഡൽഹി: മാസപ്പടി–എക്സാലോജിക് കേസിൽ പിണറായി വിജയന് ക്ലീൻ ചീറ്റ് ലഭിച്ചു എന്ന തരത്തിലാണ് ചില മലയാള മാദ്ധ്യമങ്ങളിലെ വാർത്തയും പ്രതികരണവും. പിണറായിയുടെ വിജയം എന്ന തരത്തിൽ പോലുള്ള വ്യാഖ്യാനങ്ങളും ഇവർ നൽകുന്നുണ്ട്. ഇതുമായി ബന്ധപ്പെട്ട യാഥാർത്ഥ്യം തുറന്നു കാട്ടുകയാണ് ബിജെപി ദേശീയ സെക്രട്ടറി കെ. സുരേന്ദ്രൻ. മാസപ്പടി–എക്സാലോജിക് കേസിൽ പിണറായി വിജയനും മകൾ വീണാ വിജയനും മുഹമ്മദ് റിയാസിനും എതിരെ രജിസ്റ്റർ ചെയ്ത എഫ്‌ഐആർ റദ്ദാക്കാൻ സുപ്രീംകോടതി തയ്യാറായിട്ടില്ലെന്ന് കെ. സുരേന്ദ്രൻ ചൂണ്ടിക്കാട്ടി. മറിച്ച്, എഫ്‌ഐആർ രജിസ്റ്റർ ചെയ്യാൻ നിർദേശിച്ച കേരള ഹൈക്കോടതി സിംഗിൾ ബെഞ്ചിന്റെ ഉത്തരവിനെ ചോദ്യം ചെയ്ത് ഡിവിഷൻ ബെഞ്ചിനെ സമീപിക്കാൻ പ്രതികൾക്ക് അവസരം നൽകുകയാണ് ചെയ്തതെന്നും അദ്ദേഹം പറഞ്ഞു.
‘ബഹുമാനപ്പെട്ട സുപ്രീം കോടതി എന്തെങ്കിലും പ്രത്യേക ആനുകൂല്യം ശ്രീ. പിണറായി വിജയനും കൂട്ടാളികൾക്കും നൽകിയിട്ടില്ല. എഫ്. ഐ. ആറുകൾ ഒന്നും തന്നെ കോടതി റദ്ദാക്കിയിട്ടില്ല. പ്രതികൾക്ക് പറയാനുള്ളതുകൂടി കേൾക്കണം. അതിന് ഒരാഴ്ചത്തെ സമയവും അനുവദിച്ചു. അത്രമാത്രം. എന്തുകൊണ്ട് സംസ്ഥാനം എഫ്. ഐ. ആർ എടുത്തില്ല എന്ന സർക്കാരിനോടുള്ള രൂക്ഷമായ ചോദ്യം കേസ്സ് അട്ടിമറിക്കാൻ സംസ്ഥാന സർക്കാർ ശ്രമിക്കുന്നു എന്ന വാദം കൂടുതൽ ബലപ്പെടുത്തുകയാണ് ചെയ്യുന്നത്. നിയമം നിയമത്തിന്റെ വഴിക്കുതന്നെ പോകും പോകണം. കുറ്റം ചെയ്തവർ നിയമത്തിന്റെ മുന്നിൽ വരികതന്നെ ചെയ്യും. ആഘോഷിക്കാൻ സി. പി. എമ്മിനും ഊറിച്ചിരിക്കാൻ കോൺഗ്രസ്സിനും ഒരു വകയും നൽകുന്നില്ല ഇന്നത്തെ സുപ്രീം കോടതി വിധി’- കെ. സുരേന്ദ്രൻ ചൂണ്ടിക്കാട്ടി
