ചണ്ഡീഗഡ്: ടൂര്ണമെന്റില് നിന്നും നേരത്തെ തന്നെ പുറത്തായ കിംഗ്സ് ഇലവന് പഞ്ചാബും ക്വാളിഫയര് ഉറപ്പിച്ച ചെന്നൈ സൂപ്പര് കിംഗ്സും തമ്മില് നടന്ന മത്സരത്തില് പഞ്ചാബിന് വിജയം. ജയത്തോടെ അവസാന സ്ഥാനക്കാരെന്ന ചീത്തപ്പേര് ഒഴിവാക്കാന് പഞ്ചാബിന് കഴിഞ്ഞു. എന്നാല് തോറ്റെങ്കിലും റണ് റേറ്റിന്റെ അടിസ്ഥാനത്തില് ചെന്നൈ സൂപ്പര് കിംഗ്സ് പോയിന്റ് പട്ടികയിലെ ഒന്നാം സ്ഥാനം നിലനിര്ത്തി.
സ്കോര്: ചെന്നൈ സൂപ്പര് കിംഗ്സ് 20 ഓവറില് 5 വിക്കറ്റ് നഷ്ടത്തില് 170 റണ്സ്. കിംഗ്സ് ഇലവന് പഞ്ചാബ് 18 ഓവറില് 4 വിക്കറ്റ് നഷ്ടത്തില് 173 റണ്സ്.
ടോസ് നേടിയ പഞ്ചാബ് ചെന്നൈയെ ബാറ്റിംഗിനയക്കുകയായിരുന്നു. ഓപ്പണര് ഫാഫ് ഡുപ്ലസിയുടെ വെടിക്കെട്ട് ബാറ്റിംഗാണ് ചെന്നൈക്ക് മികച്ച സ്കോര് സമ്മാനിച്ചത്. 55 പന്തില് 96 റണ്സ് നേടിയ ഡുപ്ലസിയ്ക്ക് സുരേഷ് റെയ്ന (53) ഉറച്ച പിന്തുണ നല്കി. എന്നാല് 12 പന്ത് നേരിട്ട ധോണിക്ക് വെറും 10 റണ്സ് നേടാനെ സാധിച്ചുള്ളു. പഞ്ചാബിനായി മുഹമ്മദ് ഷമി 2 വിക്കറ്റ് വീഴ്ത്തിയപ്പോള് സാം കറന് 35 റണ്സ് വഴങ്ങി 3 വിക്കറ്റ് സ്വന്തമാക്കി.
171 റണ്സ് വിജയലക്ഷ്യവുമായി ബാറ്റിംഗ് ആരംഭിച്ച പഞ്ചാബിന്റെ തുടക്കം ഗംഭീരമായിരുന്നു. പതിവിന് വിപരീതമായി ക്രിസ് ഗെയ്ല് കരുതലോടെ കളിച്ചപ്പോള് ആക്രമണത്തിന്റെ ചുമതല കെ.എല്.രാഹുല് ഏറ്റെടുക്കുകയായിരുന്നു. ഗെയില് 28 പന്തില് നിന്ന് 28 റണ്സ് നേടിയപ്പോള് രാഹുല് 36 പന്തില് 71 റണ്സ് എടുത്തു. ചെന്നൈക്കായി ഹര്ഭജന് സിംഗ് 4 ഓവറില് 57 റണ്സ് വഴങ്ങി 3 വിക്കറ്റ് സ്വന്തമാക്കി.
