ന്യൂ ഡല്ഹി: ഏകദിന മത്സരങ്ങളില് നിന്നും വിരമിക്കുമെന്ന സൂചന നല്കി യുവരാജ് സിംഗ്. രാജ്യാന്തര ക്രിക്കറ്റ് കൗണ്സിലിന്റെ അംഗീകാരമുള്ള ടി20 മത്സരങ്ങളില് മാത്രമായിരിക്കും യുവരാജ് ഇനി കളിക്കുക. ഇനി ഇന്ത്യന് ടീമില് സ്ഥാനം ലഭിക്കാന് സാധ്യതയില്ലാത്തതിനാലാണ് ഇത്തരമൊരു തീരുമാനത്തിലേക്ക് എത്തിയതെന്ന് അദ്ദേഹം വ്യക്തമാക്കി.
ഏകദിന മത്സരങ്ങള്ക്കു പുറമേ ഫസ്റ്റ് ക്ലാസ് മത്സരങ്ങളിലും യുവരാജ് ഇനി ഉണ്ടാവില്ല. ഈ വര്ഷം ഐപിഎല്ലില് മുംബൈ ഇന്ത്യന്സിനു വേണ്ടി കളത്തിലിറങ്ങിയ യുവരാജിന് ആദ്യത്തെ ഏതാനും മത്സരങ്ങള് മാത്രമേ കളിക്കാനായിരുന്നുള്ളൂ. ജിടി20 (കാനഡ), യൂറോ ടി20 (അയര്ലന്ഡ്, ഹോളന്ഡ്) എന്നിവിടങ്ങളില് നിന്നും അദ്ദേഹത്തിന് കളിക്കാന് ക്ഷണം ലഭിച്ചിട്ടുണ്ട്. ഇതിനാവശ്യമായ ബിസിസിഐയുടെ അനുമതിക്കായി കാത്തിരിക്കുകയാണ് യുവരാജ് സിംഗ്.
2007-ല് നടന്ന പ്രഥമ ടി20 ലോകകപ്പില് ഇന്ത്യ ജേതാക്കളായപ്പോള് യുവരാജിന്റെ സാന്നിദ്ധ്യം ഏറെ നിര്ണ്ണായകമായിരുന്നു. ഇംഗ്ലണ്ടിനെതിരെ ഒരോവറിലെ ആറു പന്തും സിക്സര് പറത്തിയ യുവരാജ് 12 പന്തില് അര്ദ്ധ സെഞ്ച്വറിയും നേടി. തുടര്ന്ന് 2011-ല് നടന്ന ഏകദിന ലോകകപ്പില് ബാറ്റുകൊണ്ടും ബോളുകൊണ്ടും ഇന്ത്യയുടെ രക്ഷകനായതും യുവി തന്നെയായിരുന്നു. ഇടക്ക് അര്ബുദം ബാധിച്ചിരുന്നെങ്കിലും അതിനെ അതിജീവിച്ചാണ് അദ്ദേഹം കളിക്കളത്തില് മടങ്ങിയെത്തിയത്.
ഇന്ത്യക്കു വേണ്ടി 304 ഏകദിന മത്സരങ്ങളും 58 ടി20 കളും 40 ടെസ്റ്റ് മത്സരങ്ങളും യുവരാജ് സിംഗ് കളിച്ചിട്ടുണ്ട്.