ന്യൂ ഡല്ഹി: ഈ വര്ഷം ഇംഗ്ലണ്ടിലും വെയില്സിലുമായി നടക്കുന്ന ലോകകപ്പ് ഏറ്റവും വെല്ലുവിളികള് നിറഞ്ഞതാകുമെന്ന് ഇന്ത്യന് നായകന് വിരാട് കോഹ്ലി. ഇംഗ്ലണ്ടിലേക്ക് യാത്ര തിരിക്കും മുന്പ് മാദ്ധ്യമങ്ങളെ കാണവേയാണ് കോഹ്ലി ലോകകപ്പിനെ കുറിച്ചുള്ള തന്റെ കാഴ്ചപ്പാടുകള് വ്യക്തമാക്കിയത്. കോച്ച് രവിശാസ്ത്രിയും കോഹ്ലിക്കൊപ്പം മാദ്ധ്യമങ്ങളെ കണ്ടു. നാളെയാണ് ലോകകപ്പിനായി ഇന്ത്യന് ടീം ഇംഗ്ലണ്ടിലേക്ക് തിരിക്കുന്നത്.
സാഹചര്യങ്ങളേക്കാള് കൂടുതലായി സമ്മര്ദ്ദങ്ങളെ കൈകാര്യം ചെയ്യലാണ് ലോകകപ്പില് പ്രധാനമെന്ന് അദ്ദേഹം പറഞ്ഞു. നല്ല കളി പുറത്തെടുക്കലാണ് ടീമിന്റെ ലക്ഷ്യമെന്നും അതുതന്നെയാണ് കഴിഞ്ഞ 2-3 വര്ഷമായി ടീം പിന്തുടര്ന്നു പോരുന്നതെന്നും കോഹ്ലി വ്യക്തമാക്കി. ഇന്ത്യ സന്തുലിതമായ ടീമാണെന്നും ഐപിഎല്ലില് ലോകകപ്പ് ടീമിലുള്ളവരെല്ലാം മികച്ച കളിയാണ് പുറത്തെടുത്തതെന്നും അദ്ദേഹം കൂട്ടിച്ചേര്ത്തു.
ലോകകപ്പിലെ എല്ലാ കളികളിലും വലിയ സ്കോര് ഉണ്ടാകുമെന്ന് പറയാന് കഴിയില്ലെന്നും എന്നാല് സമ്മര്ദ്ദം ഏറുന്നതിനാല് 260-270 റണ്സ് പ്രതിരോധിക്കാന് കഴിയുന്നത് വലിയ കാര്യമാണെന്നും അദ്ദേഹം പറഞ്ഞു. വലിയ സ്കോര് പിറക്കുന്ന മത്സരങ്ങളും ഉണ്ടാകുമെന്ന് അദ്ദേഹം വിലയിരുത്തി. ഏതെങ്കിലുമൊരു ടീമിനെ വലുതായി കാണാന് കഴിയില്ലെന്ന് അഫ്ഗാനിസ്ഥാനെ ഉദാഹരണമായി ചൂണ്ടിക്കാട്ടി കോഹ്ലി പറഞ്ഞു.
മൂന്ന് ലോകകപ്പുകളില് കളിച്ചിട്ടുണ്ടെങ്കിലും നായകനെന്ന നിലയില് വിരാട് കോഹ്ലിക്ക് ഇത് കന്നി അങ്കമാണ്. മെയ് 25-ന് ന്യൂസിലാന്ഡിനോടും 28-ന് ബംഗ്ലാദേശിനോടും ഇന്ത്യക്ക് പരിശീലന മത്സരങ്ങളുണ്ട്. മെയ് 5-ന് ദക്ഷിണാഫ്രിക്കയോടാണ് ഇന്ത്യയുടെ ആദ്യ ലോകകപ്പ് മത്സരം.