ലണ്ടന്: ലോകകപ്പ് എന്നും സച്ചില് ടെണ്ടുല്ക്കര്ക്ക് ഹരമാണ്. ഇന്ത്യക്കായി 6 ലോകകപ്പുകളിലാണ് സച്ചിന് നീലക്കുപ്പായമണിഞ്ഞിട്ടുളളത്. എന്നാല് വീണ്ടും ക്രിക്കറ്റിലേക്ക് ഒരു മടങ്ങി വരവിന് ഒരുങ്ങുകയാണ് മാസ്റ്റര് ബ്ലാസ്റ്റര്. ഇത്തവണ കമന്റേറ്ററുടെ റോളിലാണ് അദ്ദേഹം അരങ്ങേറ്റം കുറിക്കാന് ഒരുങ്ങുന്നത്.
സ്റ്റാര് സ്പോര്ട്സില് ഉച്ചക്ക് 1:30 മുതലുള്ള പ്രീ ഷോയിലാണ് കമന്റേറ്ററായി സച്ചിന് എത്തുന്നത്. മറ്റ് മുന് താരങ്ങളും പങ്കെടുക്കുന്ന പരിപാടിക്ക് ‘സച്ചിന് ഓപ്പണ്സ് എഗെയ്ന്’ എന്നാണ് പേരിട്ടിരിക്കുന്നത്. ലോകകപ്പില് ഇന്ന് നടക്കുന്ന ഇംഗ്ലണ്ട്-ദക്ഷിണാഫ്രിക്ക ഉദ്ഘാടന മത്സരത്തില് സച്ചിന് കമന്റേറ്ററായെത്തും.
ലോകകപ്പുകളുടെ ചരിത്രത്തില് ഏറ്റവും കടുതല് റണ്സ് നേടിയ താരം സച്ചിനാണ്. 6 ലോകകപ്പുകള് കളിച്ച സച്ചിന് 2278 റണ്സ് നേടിയിട്ടുണ്ട്. ഒരു ലോകകപ്പില് ഏറ്റവും കൂടുതല് റണ്സ് നേടിയ താരവും അദ്ദേഹം തന്നെയാണ്. 2003-ലെ ലോകകപ്പില് 11 മത്സരങ്ങളില് നിന്നും 673 റണ്സാണ് അദ്ദേഹം അടിച്ചു കൂട്ടിയത്. 2013-ല് ക്രിക്കറ്റില് നിന്നും വിരമിച്ചെങ്കിലും കമന്റേറ്ററായി സച്ചിന് എത്തുന്നത് ആരാധകര്ക്കിടയില് വലിയ ആവേശമാണ് സൃഷ്ടിച്ചിരിക്കുന്നത്.
