അന്താരാഷ്ട്ര മത്സരങ്ങളില് നിന്നും വിരമിച്ച മുന് ദക്ഷിണാഫ്രിക്കന് താരം എബി ഡിവില്ലിയേര്സ് കളിക്കളത്തിലേക്ക് മടങ്ങിയെത്താനും ലോകകപ്പ് കളിക്കാനും അടുത്തിടെ
ആഗ്രഹം പ്രകടിപ്പിച്ചിരുന്നു. എന്നാല് താരത്തിന്റെ ആവശ്യം ദക്ഷിണാഫ്രിക്കന് ടീം മാനേജ്മെന്റ് നിരസിച്ചതായാണ് റിപ്പോര്ട്ടുകള് സൂചിപ്പിക്കുന്നത്.
ലോകകപ്പിനുള്ള ദക്ഷിണാഫ്രിക്കന് ടീമിനെ പ്രഖ്യാപിക്കുന്നതിനു തലേന്നാണ് ഡിവില്ലിയേര്സ് തന്റെ ആഗ്രഹം ടീം മാനേജ്മെന്റിനെ അറിയിച്ചത്. കഴിഞ്ഞ വര്ഷം ഡിവില്ലിയേര്സ് അന്താരാഷ്ട്ര മത്സരങ്ങളില് നിന്നും വിരമിക്കല് പ്രഖ്യാപിച്ചതിനു ശേഷം ടീമില് കാര്യമായ മാറ്റങ്ങളൊന്നും തന്നെ വന്നിട്ടില്ലാത്ത സാഹചര്യത്തില് താരത്തിന്റെ മടങ്ങി വരവ് സ്വാഗതം ചെയ്താല് അത് മറ്റ് ടീമംഗങ്ങളോട് ചെയ്യുന്ന അനീതിയാകുമെന്നാണ് ടീം മാനേജ്മെന്റിന്റെ നിലപാട്.
ദക്ഷിണാഫ്രിക്കന് നായകന് ഫാഫ് ഡുപ്ലസി, കോച്ച് ഓട്ടിസ് ഗിബ്സന്, ടീം സെലക്ഷന് കണ്വീനര് ലിന്ഡ സോന്ഡി എന്നിവരുമായി ഡിവില്ലിയേര്സ് ചര്ച്ച നടത്തിയതായും റിപ്പോര്ട്ടുകളുണ്ട്. കഴിഞ്ഞ വര്ഷം മെയ് മാസത്തിലാണ് ഡിവില്ലിയേര്സ് അന്താരാഷ്ട്ര മത്സരങ്ങളില് നിന്നും വിരമിക്കല് പ്രഖ്യാപിച്ചിരുന്നത്. എന്നാല് വിരമിച്ച് ഒരു വര്ഷം പിന്നിട്ടിട്ടും അദ്ദേഹം ടീം സെലക്ഷന് ചട്ടങ്ങള് പൂര്ത്തിയാക്കിയിരുന്നില്ല. വിരമിക്കല് പ്രഖ്യാപിച്ച ശേഷം ദക്ഷിണാഫ്രിക്കയുടെ പ്രാദേശിക മത്സരങ്ങളോ മറ്റ് അന്താരാഷ്ട്ര മത്സരങ്ങളോ കളിക്കണമെന്നാണ് ചട്ടം. ഇതാണ് താരത്തിന്റെ മടങ്ങി വരവ് നിരാകരിക്കാനുള്ള പ്രധാന കാരണമായി ചൂണ്ടിക്കാണിക്കപ്പെടുന്നത്.
എന്നാല് ലോകകപ്പില് കളിച്ച ആദ്യ മൂന്ന് മത്സരവും ദക്ഷിണാഫ്രിക്ക പരാജയപ്പെട്ടതിന്റെ പിന്നാലെ ഡിവില്ലിയേര്സിനെ ടീമില് ഉള്പ്പെടുത്തണമെന്ന ആരാധകരുടെ ആവശ്യവും ശക്തമാണ്. ദക്ഷിണാഫ്രിക്കക്ക് വേണ്ടി 228 ഏകദിനങ്ങള് കളിച്ച അദ്ദേഹം 53.50 ശരാശരിയില് 9577 റണ്സ് നേടിയിട്ടുണ്ട്. ഏകദിനത്തില് ഏറ്റവും വേഗമേറിയ സെഞ്ച്വറിയും ഡിവില്ലിയേര്സിന്റെ പേരിലാണ്. 2015 ജനുവരിയില് വെസ്റ്റ് ഇന്ഡീസിനെതിരെ നടന്ന മത്സരത്തില് 31 പന്തില് നിന്നാണ് അദ്ദേഹം സെഞ്ച്വറി പിന്നിട്ടത്.
