Sports

ഇംഗ്ലണ്ട് തനി നിറം കാട്ടി; ബംഗ്ലാദേശിനെതിരെ 106 റണ്‍സിന്റെ വമ്പന്‍ വിജയം

കാര്‍ഡിഫ്: ലോകകപ്പില്‍ ഇംഗ്ലണ്ടിന്റെ ശക്തിപ്രകടനത്തിനു അക്ഷരാര്‍ത്ഥത്തില്‍ വേദിയാകുകയായിരുന്നു കാര്‍ഡിഫ്. ബംഗ്ലാദേശ് ബോളിംഗ് നിരയെ തലങ്ങും വിലങ്ങും പായിച്ച ഇംഗ്ലീഷ് ബാറ്റിംഗ് നിര അടിച്ചെടുത്തത് 386 എന്ന പടു കൂറ്റന്‍ സ്‌കോര്‍. ആദ്യം അടിച്ചെടുത്ത സ്‌കോര്‍ പിന്നീട് എറിഞ്ഞു പിടിക്കാനും ആതിഥേയര്‍ക്ക് ബുദ്ധിമുട്ടുണ്ടായിരുന്നില്ല. മറുപടി ബാറ്റിംഗില്‍ ബംഗ്ലാദേശ് 280 റണ്‍സിലൊതുങ്ങി. ആതിഥേയരുടെ വിജയം 106 റണ്‍സിനു.

ഇംഗ്ലണ്ട് ടീമിന്റെ ഓള്‍റൗണ്ട് മികവ് തെളിയിച്ച മത്സരമായിരുന്നു ബംഗ്ലാദേശിനെതിരെ നടന്നത്. ബാറ്റിംഗിലും ബോളിംഗിലും ഒരുപോലെ മികച്ചു നിന്ന ഇംഗ്ലണ്ട് അടിച്ചെടുത്തത് 386 റണ്‍സ് എന്ന കൂറ്റന്‍ സ്‌കോര്‍. ഓപ്പണര്‍ ജേസന്‍ റോയിയുടെ സെഞ്ച്വറി(121 പന്തില്‍ 153) മികവിലാണ് ഇംഗ്ലണ്ട് ഈ ലോകകപ്പിലെ ഉയര്‍ന്ന സ്‌കോര്‍ കുറിച്ചത്. 14 ബൗണ്ടറികളും 5 സിക്‌സറുകളുമാണ് റോയിയുടെ ബാറ്റില്‍ നിന്നും പിറന്നത്. ജോണി ബെയര്‍സ്‌റ്റോ 51 റണ്‍സെടുത്ത് റോയിക്ക് മികച്ച പിന്തുണ നല്‍കി. ഓപ്പണിംഗ് വിക്കറ്റില്‍ ഇരുവരും ചേര്‍ന്നു നേടിയത് 128 റണ്‍സിന്റെ കൂട്ടുകെട്ട്. ജോസ് ബട്‌ലര്‍ 44 പന്തില്‍ 64 റണ്‍സ് നേടി. ലോകകപ്പില്‍ ഇംഗ്ലണ്ടിന്റെ ഏറ്റവും ഉയര്‍ന്ന സ്‌കോര്‍ കൂടിയാണ് കാഡിഫില്‍ പിറന്നത്. 2011ല്‍ ഇന്ത്യയ്‌ക്കെതിരെ നേടിയ 338 റണ്‍സാണ് ഇന്ന് തിരുത്തിക്കുറിച്ചത്.

ബംഗ്ലാദേശിനായി മെഹദി ഹസന്‍, മുഹമ്മദ് സൈഫുദ്ദീന്‍ എന്നിവര്‍ രണ്ടു വിക്കറ്റു വീതം നേടിയപ്പോള്‍ മഷ്‌റഫി മുര്‍ത്താസ, മുസ്താഫിസുര്‍ റഹ്മാന്‍ എന്നിവര്‍ ഓരോ വിക്കറ്റും സ്വന്തമാക്കി.

മറുപടി ബാറ്റിംഗില്‍ ഷക്കിബ് അല്‍ ഹസന്റെ ഒറ്റയാള്‍ പോരാട്ടം മാത്രമായിരുന്നു ബംഗ്ലാദേശിന് കുറച്ചെങ്കിലും ആശ്വാസം നല്‍കിയത്. 119 പന്തില്‍ 121 റണ്‍സ് നേടിയ ഷക്കിബിന് മറ്റു ബാറ്റ്‌സമാന്‍മാരുടെ പിന്തുണ ലഭിക്കാതെ പോയത് ബംഗ്ലാദേശിന് തിരിച്ചടിയായി. 44 റണ്‍സ് നേടിയ മുഷ്ഫിഖുര്‍ റഹീം മാത്രമാണ് ബംഗ്ലാദേശ് നിരയില്‍ അല്‍പ്പമെങ്കിലും പിടിച്ചു നിന്നത്. മഹമ്മുദുളള 28 റണ്‍സ് നേടി പുറത്തായി.

ഇംഗ്ലണ്ടിനായി ബെന്‍ സ്റ്റോക്‌സ് 6 ഓവറില്‍ 23 റണ്‍സ് വഴങ്ങി 3 വിക്കറ്റ് വീഴ്ത്തിയപ്പോള്‍ ജോഫ്ര ആര്‍ച്ചര്‍ 29 റണ്‍സ് വഴങ്ങിയാണ് മൂന്നു വിക്കറ്റ് നേടിയത്. മാര്‍ക്ക് വുഡ് രണ്ടും ലിയാം പ്ലങ്കറ്റ്, ആദില്‍ റഷീദ് എന്നിവര്‍ ഓരോ വീക്കറ്റു വീതവും സ്വന്തമാക്കി.

411 Shares

Scroll down for comments

Post Your Comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close