Sports

‘ബലിദാന്‍ മുദ്ര ഗ്ലൗവില്‍ മാത്രം പോരാ, ബാറ്റിലും വേണം’; ധോണിയെ പിന്തുണച്ച്, പ്രശ്‌നത്തിന് പരിഹാരം കണ്ട് വീരേന്ദര്‍ സേവാഗ്

ന്യൂ ഡല്‍ഹി: ഐസിസിയുടെ അനുമതി വാങ്ങിയ ശേഷം ബലിദാന്‍ മുദ്ര കീപ്പിംഗ് ഗ്ലൗവിനു പുറമേ ബാറ്റിലും ഉള്‍പ്പെടുത്തണമെന്ന് ധോണിക്ക് സേവാഗിന്റെ ഉപദേശം. ട്വിറ്ററിലൂടെയാണ് സേവാഗ് ധോണിക്ക് പിന്തുണ അറിയിച്ച് രംഗത്തെത്തിയത്.

ഐസിസിയില്‍ നിന്ന് അനുവാദം വാങ്ങിയ ശേഷം ബാറ്റിലും ബലിദാന്‍ മുദ്ര പ്രദര്‍ശിപ്പിക്കണമെന്നാണ് സേവാഗ് ധോണിക്ക് നല്‍കിയ നിര്‍ദ്ദേശം. ഒരു കളിക്കാരനു തന്റെ ബാറ്റില്‍ രണ്ട് ലോഗോകള്‍ ഉള്‍പ്പെടുത്താമെന്നാണ് ചട്ടം. ഇതു ചൂണ്ടിക്കാട്ടിയാണ് സേവാഗ് പ്രശ്‌നത്തിന് ‘പരിഹാരം’ കണ്ടെത്തിയിരിക്കുന്നത്.

‘ദക്ഷിണാഫ്രിക്കയുമായുള്ള മത്സരത്തില്‍ എം.എസ് ധോണി ബലിദാന്‍ മുദ്രയുള്ള വിക്കറ്റ് കീപ്പിംഗ് ഗ്ലൗവാണ് ഉപയോഗിച്ചത്. എന്നാല്‍ അനുവാദം വാങ്ങാതെ ധോണി ഗ്ലൗവ് ഉപയോഗിച്ചതിനാല്‍ ബിസിസിഐയോട് ഗ്ലൗവില്‍ നിന്ന് ബലിദാന്‍ മുദ്ര നീക്കണമെന്ന് ഐസിസി ആവശ്യപ്പെട്ടിരുന്നു. എന്നാല്‍ ഐസിസിയുടേയും ധോണിയുടേയും ഭാഗം ഒരുപോലെതന്നെ ശരിയാണ്’. സേവാഗ് പറഞ്ഞു.

ഐസിസിയില്‍ നിന്നും അനുവാദം വാങ്ങിയ ശേഷം ധോണിക്ക് തന്റെ ബാറ്റില്‍ ബലിദാന്‍ മുദ്ര ഉപയോഗിക്കാം. ഒരു കളിക്കാരന് തന്റെ ബാറ്റില്‍ ബാറ്റ് നിര്‍മ്മാതാക്കളുടെ ലോഗോക്ക് പുറമേ മറ്റൊരു ലോഗോ കൂടി ഉപയോഗിക്കാമെന്ന് സേവാഗ് ചൂണ്ടിക്കാട്ടി. മുന്‍പ് സേവാഗ് തന്റെ ബാറ്റില്‍ ഐസിസിയുടെ അനുവാദത്തോടെ എസ്‌ഐഎസ്‌ജെ.ഇന്‍ (സേവാഗ് ഇന്റര്‍നാഷണല്‍ സ്‌കൂള്‍) എന്ന ലോഗോ നിരവധി മത്സരങ്ങളില്‍ ഉപയോഗിച്ചിരുന്നു.

സൈനികരോടുള്ള ആദര സൂചകമായി ഗ്ലൗവില്‍ ബലിദാന്‍ മുദ്രയുമായി ലോകകപ്പിലെ ദക്ഷിണാഫ്രിക്കയ്‌ക്കെതിരായ മത്സരത്തില്‍ ധോണി കളിക്കുന്ന ചിത്രങ്ങള്‍ സാമൂഹികമാദ്ധ്യമങ്ങളില്‍ വൈറലായിരുന്നു. ഇതോടെയാണ് മുദ്ര നീക്കം ചെയ്യണമെന്ന ആവശ്യവുമായി ഐസിസി, ബിസിസിഐയെ സമീപിച്ചത്.

2011 ല്‍ ധോണിക്ക് ഇന്ത്യന്‍ സൈന്യം ടെറിട്ടോറിയല്‍ ആര്‍മിയില്‍ ലെഫ്റ്റനന്റ് കേണല്‍ പദവി നല്‍കിയിരുന്നു. പാരാ റെജിമെന്റില്‍ പരിശീലനവും നേടിയിരുന്നു. പിന്നീട് രാജ്യം പദ്മഭൂഷണ്‍ നല്‍കി ആദരിച്ചപ്പോഴും പുരസ്‌കാരം വാങ്ങാന്‍ ധോണി എത്തിയത് പൂര്‍ണ സൈനിക യൂണിഫോമിലായിരുന്നു.

11K Shares

Scroll down for comments

Post Your Comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close