ഓവല്: നിലവിലെ ചാംപ്യന്മാരായ ഓസ്ട്രേലിയക്കെതിരെ ഇന്ത്യക്ക് 36 റണ്സ് വിജയം. ടോസ് നേടി ആദ്യം ബാറ്റ് ചെയ്ത ഇന്ത്യ നിശ്ചചിത 50 ഓവറില് 5 വിക്കറ്റ് നഷ്ടത്തില് 352 റണ്സെടുത്തു. മറുപടി ബാറ്റിംഗില് ഓസ്ട്രേലിയ 50 ഓവറില് 316 റണ്സിന് എല്ലാവരും പുറത്തായി.
ഓപ്പണര്മാരായ രോഹിത് ശര്മ്മയും ശിഖര് ധവാനും മികച്ച തുടക്കമാണ് ഇന്ത്യക്ക് നല്കിയത്. ആദ്യ വിക്കറ്റില് 127 റണ്സ് കൂട്ടിച്ചേര്ത്ത ശേഷമാണ് രോഹിത് ശര്മ്മ (57) പുറത്തായത്. മികച്ച ഫോമില് കളിച്ച ധവാന് 109 പന്തില് 16 ബൗണ്ടറികളടക്കം 117 റണ്സ് നേടി.
നായകന് വിരാട് കോഹ്ലി 82 റണ്സ് നേടിയപ്പള് അവസാന നിമിഷം ആഞ്ഞടിച്ച ഹര്ദിക് പാണ്ഡ്യ 27 പന്തില് 4 ബൗണ്ടറിയും 3 സിക്സറുകളുമടക്കം 48 റണ്സാണ് നേടിയത്. പാണ്ഡ്യക്ക് പിന്നാലെ ക്രീസിലെത്തിയ മഹേന്ദ്ര സിംഗ് ധോണി 14 പന്തില് 27 റണ്സെടുത്തു.
ഓസ്ട്രേലിയക്കു വേണ്ടി മാര്ക്കസ് സ്റ്റോയിനിസ് രണ്ടും പാറ്റ് കമ്മിന്സ്, മിച്ചല് സ്റ്റാര്ക്ക്, നഥാന് കോട്ടര്നൈല്, എന്നിവര് ഓരോ വിക്കറ്റ് വീതവും സ്വന്തമാക്കി.
മറുപടി ബാറ്റിംഗില് ഇന്ത്യയുടേതിന് സമാനമായ തുടക്കമായിരുന്നു ഓസ്ട്രേലിയയുടേതും. സാവധാനം കളി മുന്നോട്ടു കൊണ്ടുപോയ വാര്ണര്-ഫിഞ്ച് സഖ്യം ഒന്നാം വിക്കറ്റില് 61 റണ്സിന്റെ കൂട്ടുകെട്ടുണ്ടാക്കി. 36 റണ്സെടുത്ത ആരോണ് ഫിഞ്ച് വാര്ണര്ക്ക് മികച്ച പിന്തുണ നല്കി.
വാര്ണര് 84 പന്തുകള് നേരിട്ട് 56 റണ്സും സ്റ്റീവ് സ്മിത് 69 റണ്സും നേടി. സ്മിത്താണ് ഓസീസ് നിരയിലെ ടോപ് സ്കോറര്. 14 പന്തില് 28 റണ്സ് നേടിയ മാക്സ്വെല്ലിനെ ചഹലിന്റെ പന്തില് മനോഹരമായ ക്യാച്ചിലൂടെ പകരക്കാരനായിറങ്ങിയ രവീന്ദ്ര ജഡേജയാണ് പുറത്താക്കിയത്. അവസാനം വരെ പൊരുതിയ അലക്സ് കാരി 55 റണ്സ് നേടി പുറത്താകാതെ നിന്നു.
ഇന്ത്യക്കു വേണ്ടി ഭുവനേശ്വര് കുമാറും ജസ്പ്രീത് ബുംമ്രയും 3 വിക്കറ്റു വീതം വീഴ്ത്തി. യുസ്വേന്ദ്ര ചഹല് 10 ഓവറില് 62 റണ്സ് വഴങ്ങി 2 വിക്കറ്റ് സ്വന്തമാക്കി.