ഓവല്: ഓസീസ് നായകന് ആരോണ് ഫിഞ്ച് മുന്നില് നിന്നു പട നയിച്ച മത്സരത്തില് സിംഹള വീര്യം ചോര്ന്നു. നിശ്ചിത 50 ഓവറില് ഓസ്ട്രേലിയ അടിച്ചു കൂട്ടിയത് 7 വിക്കറ്റ് നഷ്ടത്തില് 334 റണ്സ്. മറുപടി ബാറ്റിംഗില് ഗംഭീര തുടക്കം ലഭിച്ചിട്ടും അത് മുതലാക്കാനാകാതെ ശ്രീലങ്ക പരാജയം സമ്മതിക്കുകയായിരുന്നു.
ആദ്യം ബാറ്റു ചെയ്ത ഓസ്ട്രേലിയക്കു വേണ്ടി ഓപ്പണര്മാരായ ഡേവിഡ് വാര്ണ്ണറും ആരോണ് ഫിഞ്ചും കൂട്ടിച്ചേര്ത്തത് 80 റണ്സ്. വാര്ണ്ണര് 26 റണ്സ് നേടി പുറത്തായി. മൂന്നാമനായെത്തിയ ഉസ്മാന് ഖവാജക്കും പിടിച്ചു നില്ക്കാനായില്ല. തുടര്ന്ന് ക്രീസില് ഒന്നിച്ച ഫിഞ്ചും സ്മിത്തും ഓസ്ട്രേലിയന് ഇന്നിംഗിസിനു വേഗം കൂട്ടി. ഫിഞ്ച് 132 പന്തില് 15 ബൗണ്ടറികളും 5 സിക്സറുകളുമുള്പ്പെടെ 153 റണ്സ് നേടി. സ്മിത്ത് 73 റണ്സ് നേടി പുറത്തായപ്പോള് അവസാന ഓവറുകളില് ആഞ്ഞടിച്ച ഗ്ലെന് മാക്സ്വെല് 25 പന്തില് 46 റണ്സ് നേടി പുറത്താകാതെ നിന്നു.
ശ്രീലങ്കക്കു വേണ്ടി ഉസിരു ഉഡാന, ധനഞ്ജയ ഡി സില്വ എന്നിവര് 2 വിക്കറ്റ് വീതം നേടിയപ്പോള് ലസിത് മലിംഗ 10 ഓവറില് 61 റണ്സ് വഴങ്ങി ഒരു വിക്കറ്റ് സ്വന്തമാക്കി.
335 റണ്സ് വിജയലക്ഷ്യവുമായി ബാറ്റിംഗ് ആരംഭിച്ച ലങ്കക്ക് വേണ്ടി ഓപ്പണര്മാരായ കരുണരത്നെയും കുശാല് പെരേരയും ആദ്യ വിക്കറ്റില് 115 റണ്സാണ് നേടിയത്. പെരേര 36 പന്തില് 52 റണ്സ് നേടിയപ്പോള് നായകന് കരുണരത്നെ സെഞ്ച്വറിക്ക് 3 റണ്സ് മാത്രം അകലെ വീണു. ഓപ്പണര്മാരെ നഷ്ടമായതോടെ ശ്രീലങ്ക കൂട്ടത്തകര്ച്ച നേരിട്ടു. 30 റണ്സെടുത്ത കുശാല് പെരേരയാണ് പിന്നീട് അല്പ്പമെങ്കിലും പിടിച്ചു നിന്നത്.
ഓസ്ട്രേലിയക്ക് വേണ്ടി മിച്ചല് സ്റ്റാര്ക്ക് 10 ഓവറില് 55 റണ്സ് വഴങ്ങി 4 വിക്കറ്റ് വീഴ്ത്തി. കെയ്ന് റിച്ചാഡ്സണ് 3 വിക്കറ്റും പാറ്റ് കമ്മിന്സ് 2 വിക്കറ്റും സ്വന്തമാക്കി.