മാഞ്ചസ്റ്റര്: ഈ ലോകകപ്പിലെ ഏറ്റവും വലിയ സ്കോറാണ് ഇംഗ്ലണ്ട് അഫ്ഗാനിസ്ഥാനെതിരെ 6 വിക്കറ്റ് നഷ്ടത്തില് നേടിയ 397 റണ്സ്. ഇംഗ്ലീഷ് ബാറ്റിംഗ് നിര ഒരു ദയയുമില്ലാതെയാണ് അഫ്ഗാന് ബോളര്മാരെ തലങ്ങും വിലങ്ങും പായിച്ചത്. നായകന് ഇയന് മോര്ഗന് മുന്നില് നിന്നു നയിച്ച ബാറ്റിംഗ് വെടിക്കെട്ടില് കണക്കിലേറെ അടി കിട്ടിയത് അഫ്ഗാന്റെ തുറുപ്പു ചീട്ടായ റാഷിദ് ഖാനായിരുന്നു.
9 ഓവറില് ഒരു വിക്കറ്റ് പോലും നേടാനാകാതെ 110 റണ്സാണ് റാഷിദ് വഴങ്ങിയത്.ലോകകപ്പ് ചരിത്രത്തില് ഒരു ബോളറുടെ ഏറ്റവും മോശം പ്രകടനമാണിത്. എന്നാല് ഭാഗ്യത്തിന് ഏകദിന ക്രിക്കറ്റിലെ ഒരു ബോളറുടെ മോശം പ്രകടനമെന്ന റെക്കോര്ഡ് റാഷിദിന് ലഭിച്ചില്ല. 113 റണ്സ് വഴങ്ങിയ ഓസ്ട്രേലിയയുടെ മൈക് ലെവിസാണ് ഏകദിന മത്സരത്തില് ഏറ്റവും കൂടുതല് റണ്സ് വഴങ്ങിയ താരം. പാക് പേസര് വഹാബ് റിയാസും 110 റണ്സ് വഴങ്ങിയിട്ടുണ്ട്. എന്നാല് ഇരുവരും 10 ഓവര് പൂര്ത്തിയാക്കിയിരുന്നു. റാഷിദ് ഖാന് 9 ഓവറിലാണ് 110 റണ്സ് വഴങ്ങിയത്.
ഇതിനു പുറമേ ഏകദിന മത്സരങ്ങളില് ഒരു ബാറ്റ്സ്മാന് ഒരു ബോളര്ക്കെതിരെ നേടുന്ന ഏറ്റവും കൂടുതല് സിക്സുകളാണ് ഇന്ന് മോര്ഗന് റാഷിദ് ഖാനെതിരെ നേടിയത്. 7 തവണയാണ് മോര്ഗന് റാഷിദിനെ അതിര്ത്തി കടത്തിയത്. ഏകദിനത്തില് 100 റണ്സ് വഴങ്ങുന്ന ആദ്യ സ്പിന്നര് എന്ന റെക്കോര്ഡും റാഷിദ് ഖാന്റെ പേരിലായി.
