മാഞ്ചസ്റ്റര്: ലോകകപ്പില് ഇംഗ്ലണ്ടിന്റെ കുതിപ്പ് തുടരുന്നു. അഫ്ഗാനിസ്ഥാനെ 150 റണ്സിനു പരാജയപ്പെടുത്തിയ ആതിഥേയര് പോയിന്റ് പട്ടികയില് ഒന്നാമതെത്തി. സ്കോര്: ഇംഗ്ലണ്ട് 50 ഓവറില് 6 വിക്കറ്റ് നഷ്ടത്തില് 397 റണ്സ്, അഫ്ഗാനിസ്ഥാന് 50 ഓവറില് 8 വിക്കറ്റ് നഷ്ടത്തില് 247 റണ്സ്.
ടോസ് നേടി ആദ്യം ബാറ്റ് ചെയ്ത ചെയ്ത ഇംഗ്ലണ്ടിനു ഓപ്പണര്മാരായ ജയിംസ് വിന്സും ജോണി ബെയര്സ്റ്റോയും ഭേദപ്പെട്ട തുടക്കമാണ് നല്കിയത്. ഒന്നാം വിക്കറ്റില് 44 റണ്സ് ചേര്ത്ത ശേഷം 26 റണ്സുമായി വിന്സ് മടങ്ങി. തുടര്ന്ന് ക്രീസിലെത്തിയ ജോ റൂട്ട് ബെയര്സ്റ്റോയുമായി ചേര്ന്ന് ഇംഗ്ലണ്ടിന്റെ സ്കോറിംഗ് വേഗത്തിലാക്കി. ബെയര്സ്റ്റോ 90 റണ്സിനു പുറത്തായി. റൂട്ട് 88 റണ്സെടുത്തു.
മികച്ച അടിത്തറയില് നിന്നും ടീമിനെ കൂറ്റന് സ്കോറിലേക്കെത്തിക്കുക എന്ന ചുമതല അതിഗംഭീരമായി നിര്വ്വഹിച്ച നായകന് ഇയന് മോര്ഗന് 71 പന്തില് 4 ബൗണ്ടറികളും 17 സിക്സറുകളും സഹിതം 148 റണ്സ് നേടി. ഒരു ഏകദിന മത്സരത്തില് ഏറ്റവും കൂടുതല് സിക്സറുകള് നേടുന്ന താരമെന്ന റെക്കോര്ഡ് മോര്ഗന് സ്വന്തമാക്കി. അവസാന ഓവറുകളില് കത്തിക്കയറിയ മൊയീന് അലി 9 പന്തില് 31 റണ്സെടുത്ത് പുറത്താകാതെ നിന്നു.
അഫ്ഗാനു വേണ്ടി ദവ്ലാത്ത് സദ്രാന്, ഗുല്ബദിന് നയീബ് എന്നിവര് 3 വിക്കറ്റു വീതം സ്വന്തമാക്കിയപ്പോള് റാഷിദ് ഖാന് നിരാശപ്പെടുത്തി. 9 ഓവറില് 110 റണ്സ് വഴങ്ങിയ റാഷിദിന് ഒരു വിക്കറ്റു പേലും നേടാനായില്ല. ലോകകപ്പ് ചരിത്രത്തില് ഒരു ബോളറുടെ ഏറ്റവും മോശം പ്രകടനമാണിത്.
തകര്ച്ചയോടെയാണ് അഫ്ഗാനിസ്ഥാന്റെ മറുപടി ബാറ്റിംഗ് ആരംഭിച്ചത്. ഓപ്പണര് നൂര് അലി സദ്രാന് റണ്സ് ഒന്നും നേടാതെയാണ് പുറത്തായത്. നായകന് ഗുല്ബദീന് നയീബ് 37 റണ്സും റഹ്മത് ഷാ 46 റണ്സും നേടി പുറത്തായി. 76 റണ്സ് നേടിയ ഹഷ്മത്തുള്ള ഷഹീദിയാണ് അഫ്ഗാന്റെ ടോപ്പ് സ്കോറര്.
ഇംഗ്ലണ്ടിനായി ജോഫ്ര ആര്ച്ചര്, ആദില് റഷീദ് എന്നിവര് 3 വിക്കറ്റ് വീതം വീഴ്ത്തി. മാര്ക്ക് വുഡ് 10 ഓവറില് 40 റണ്സ് വഴങ്ങി 2 വിക്കറ്റ് സ്വന്തമാക്കി.
ജയത്തോടെ ഇംഗ്ലണ്ട് 8 പോയിന്റുമായി ഒന്നാം സ്ഥാനത്തെത്തി. ഓസ്ട്രേലിയയാണ് രണ്ടാം സ്ഥാനത്ത്. 4 കളികളില് നിന്ന് 7 പോയിന്റുമായി ഇന്ത്യ നാലാം സ്ഥാനത്താണ്.