എഡ്ജ്ബാസ്റ്റണ്‍: ലോകകപ്പില്‍ ബംഗ്ലാദേശിനെതിരെ ഇന്ത്യക്ക് മികച്ച സ്‌കോര്‍. ടോസ് നേടി ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറില്‍ 9 വിക്കറ്റ് നഷ്ടത്തില്‍ 314 റണ്‍സെടുത്തു.
ഇന്ത്യയുടെ തുടക്കം ഗംഭീരമായിരുന്നു. ഒന്നാം വിക്കറ്റില്‍ 180 റണ്‍സാണ് രോഹിത്-രാഹുല്‍ സഖ്യം അടിച്ചു കൂട്ടിയത്. 7 ബൗണ്ടറികളും 5 സിക്‌സറുകളും സഹിതം കരിയറിലെ 26-ാമത്തെയും ഈ ലോകകപ്പിലെ നാലാമാത്തേയും സഞ്ച്വറിയുമായി ‘ഹിറ്റ്മാന്‍’ കളം നിറഞ്ഞതോടെ ഇന്ത്യയുടെ സ്‌കോര്‍ ബോര്‍ഡ് അതിവേഗം മുന്നോട്ടു പോയി. ലോകകപ്പില്‍ മൂന്ന് സെഞ്ച്വറികള്‍ നേടിയ സൗരവ് ഗാംഗുലിയുടെ റെക്കോര്‍ഡ് മറികടന്ന രോഹിത് ഒരു ലോകകപ്പില്‍ ഏറ്റവും കൂടുതല്‍ സെഞ്ച്വറികളെന്ന(4) സംഗക്കാരയുടെ റെക്കോര്‍ഡിനൊപ്പമെത്തി.
ഇതിനിടയില്‍ രാഹുല്‍ അര്‍ദ്ധ സെഞ്ച്വറി (77) പിന്നിട്ടു. മൂന്നാമനായി ക്രീസിലെത്തിയ നായകന്‍ വിരാട് കോഹ്‌ലിക്ക് പക്ഷേ (26) നിലയുറപ്പിക്കാനായില്ല. തുടര്‍ന്ന് റിഷഭ് പന്ത് 41 പന്തില്‍ 48 റണ്‍സ് നേടിയപ്പോള്‍ ധോണി 35 റണ്‍സ് നേടി പുറത്തായി. ആദ്യ വിക്കറ്റില്‍ മികച്ച തുടക്കം ലഭിച്ചിട്ടും ഇന്ത്യയുടെ മധ്യനിര നിരാശപ്പെടുത്തി.
ബംഗ്ലാദേശിനു വേണ്ടി 10 ഓവറില്‍ 59 റണ്‍സ് വഴങ്ങി 5 വിക്കറ്റ് വീഴ്‌ത്തിയ മുസ്താഫിസുര്‍ റഹ്മാന്റെ പ്രകടനമാണ് അവസാന ഓവറുകളില്‍ നിര്‍ണ്ണായകമായത്. ഷക്കിബ് അല്‍ ഹസന്‍, റൂബല്‍ ഹുസൈന്‍, സൗമ്യ സര്‍ക്കാര്‍ എന്നിവര്‍ ഓരോ വിക്കറ്റ് വീതം സ്വന്തമാക്കി.
