ജനീവ: കൊറോണ പ്രതിസന്ധിയില് ലോകം ലോക്ഡൗണിലേക്ക് നീങ്ങിയതോടെ തൊഴില് നഷ്ടപ്പെട്ടത് കൂടുതലും യുവാക്കള്ക്കും അതില് സ്ത്രീകള്ക്കുമാണെന്ന് ഐക്യരാഷ്ട്ര സഭയുടെ നിരീക്ഷണം. ചൈനയില് ആരംഭിച്ച വൈറസ് ബാധ ആദ്യം തൊഴില് പ്രശ്നം അവിടെത്തന്നെ രൂക്ഷമാക്കിയെന്നാണ് കണക്കുകള് സൂചിപ്പിക്കുന്നത്. ഇതിനിടെ ലോകം ലോക്ഡൗണിലേക്ക് നീങ്ങിയത് നിശ്ചലമാക്കിയത് മാര്ക്കറ്റിംഗ് മേഖലകളെയാണ്. അത്തരം മേഖലകളിലും യാത്രാ സംവിധാനം ഒരുക്കുന്ന മേഖലകളിലും ജോലിചെയ്യുന്നവരില് ഭൂരിഭാഗവും യുവാക്കളാണ്. 29 വയസ്സില് താഴെ പ്രായമുള്ള ആറുപേരില് ഒരാള്ക്ക് എന്ന നിലയിലാണ് ആഗോള തലത്തില് തൊഴില് നഷ്ടപ്പെട്ടിരിക്കുന്നത്.
ആഗോളതലത്തിലെ ജോലി ലഭ്യതയെ അടുത്ത ഒരു ദശകം ഈ പ്രശ്നം ബാധിക്കുമെന്നും അതാത് രാജ്യത്തെ സംവിധാനങ്ങള് ജനങ്ങള്ക്ക് ജോലി നല്കേണ്ടി വരുമെന്നും ഐക്യാരാഷ്ട്രസഭ ചൂണ്ടിക്കാട്ടുന്നു. തൊഴിലിനപ്പുറം വിദ്യാഭ്യാസവും പരിശീലനവും നിശ്ചലമാക്കിയ ലോകം അടുത്ത ഒരു മാസത്തിനുള്ളില് പ്രതിവിധികള് കണ്ടെത്തേണ്ടിവരുമെന്നാണ് ഐക്യരാഷ്ട്രസഭ ചൂണ്ടിക്കാട്ടുന്നത്.
