ന്യൂഡല്ഹി: കൊറോണ പ്രതിസന്ധിയുടെ പേരില് അമേരിക്ക നടപ്പാക്കുന്ന വിസ നിയന്ത്രണത്തില് ഇന്ത്യ ചര്ച്ച നടത്തി. വിവിധ വിഷയങ്ങളിലെ പഠനത്തിനായി ശ്രമിക്കുന്ന വിദ്യാര്ത്ഥികളെ ബാധിക്കുന്ന വിസ നയത്തില് അനുഭാവ പൂര്ണ്ണമായ നിലപാടുകള് സ്വീകരിക്കാന് അമേരിക്ക തയ്യാറാണെന്ന സൂചനയാണ് ലഭിക്കുന്നത്.
വിദേശകാര്യ സെക്രട്ടറി ഹര്ഷവര്ധന് ഷ്രിഗ്ലയും അമേരിക്കയുടെ രാഷ്ട്രീയകാര്യ സമിതി സെക്രട്ടറി ഡേവിഡ് ഹെയ്ലുമാണ് ചര്ച്ച നടത്തിയത്. അമേരിക്കയില് എഫ്-1, എം-1 എന്നീ വിസകളെല്ലാം വിദ്യാര്ത്ഥികളുമായി ബന്ധപ്പെട്ടതാണ്. ഇവരില് ഓണ്ലൈന് ക്ലാസ്സുകള് ആഗ്രഹിക്കുന്നവരെ മാത്രമേ അമേരിക്ക വിടാന് നിര്ബന്ധിക്കൂ എന്നാണ് പുതിയ ധാരണ. അക്കാദമിക തലത്തിലല്ലാത്തതും തൊഴില് സംബന്ധമായതുമായ കോഴ്സുകളുമായി ബന്ധപ്പെട്ട വിസകളിലാണ് വ്യക്തത വരുത്തിയിരിക്കുന്നത്.
ഇന്ത്യ-അമേരിക്ക വിദേശകാര്യ ചര്ച്ചകള്ക്കിടെയാണ് വിഷയങ്ങള് ആദ്യം ശ്രദ്ധയില്പ്പെടുത്തിയതെന്ന് ഹര്ഷവര്ധന് അറിയിച്ചു. നിലവില് അമേരിക്കയില് വിദ്യാഭ്യാസത്തിനായി വിസ ലഭിച്ച് വന്നിരിക്കുന്നവര്ക്കുള്ള നിര്ദ്ദേശം നല്കിയതായി ഡേവിഡ് ഹെയ്ല് പറഞ്ഞു. മിക്ക സര്വ്വകലാശാലകളും അവരുടെ പഠനരീതി കൊറോണ വ്യാപനം കാരണം ഓണ്ലൈന് സംവിധാനത്തിലേക്ക് മാറ്റിയിട്ടുണ്ട്. അത്തരം ഒരു വിദ്യാര്ത്ഥികള്ക്കും അമേരിക്കയില് താമസിക്കാന് ഇനി അനുവാദമുണ്ടായിരിക്കില്ല എന്ന തീരുമാനവും ഹെയ്ല് അറിയിച്ചു. അവര്ക്ക് സ്വന്തം രാജ്യങ്ങളിലേക്ക് മടങ്ങാനുള്ള എല്ലാ സംവിധാനങ്ങളും അതാത് രാജ്യങ്ങളുടെ എംബസി വഴി നടത്താനുള്ള നിര്ദ്ദേശവും നല്കിയതായും ഹെയ്ല് അറിയിച്ചതായും ഹര്ഷവര്ധന് പറഞ്ഞു.