കശ്മീരിലെ ശ്രീനഗറിലുള്ള ദാൽ തടാകത്തിലെ ഹൗസ് ബോട്ടിൽ പ്രവർത്തിക്കുന്ന തപാൽ ഓഫീസ് ആണ് ലോകത്തിലെ നദിയിൽ സ്ഥിതി ചെയ്യുന്ന ഏക തപാൽ ഓഫീസ് . ആദ്യ ദർശനത്തിൽ സാധാരണ ഒരു ഷികാര വള്ളമായേ ഇതിനെ തോന്നുകയുള്ളൂ . അടുത്ത് ചെല്ലുമ്പോൾ മാത്രമാണ് തപാൽ ഓഫീസിന്റെ ചിഹ്നം ദൃശ്യമാകുക . ഒരു പോസ്റ്റ് ഓഫീസിൽ ലഭ്യമാകുന്ന എല്ലാ സേവനങ്ങളും ഇവിടെയും ലഭ്യമാണ് . എന്നാൽ ഈ തപാൽ ഓഫീസിൽ ഉപയോഗിക്കുന്ന സീൽ മറ്റുള്ളവയിൽ നിന്നും വ്യത്യസ്തമാണ് . തീയതിക്കും മേൽവിലാസത്തിനുമൊപ്പം , ഷിക്കാര തുഴയുന്ന ഒരു വള്ളക്കാരന്റെ ചിത്രവും കൂടി ഈ സീലിൽ ആലേഖനം ചെയ്തിട്ടുണ്ട് .
ബ്രിട്ടീഷുകാരുടെ കാലം മുതലേ നിലനിൽക്കുന്ന, പൈതൃകം ഉണർത്തുന്ന തപാൽ ഓഫീസ് ആണിത് . 2011 ൽ തപാൽ ഓഫീസിനോടൊപ്പം മ്യുസിയം കൂടി പ്രവർത്തനമാരംഭിച്ചു .ഹൗസ് ബോട്ടിൽ പ്രവർത്തിക്കുന്ന തപാൽ ഓഫീസിന് രണ്ടു മുറികളാണുള്ളത് . ഒന്ന് ഓഫീസ് മുറിയാണ് മറ്റൊന്ന് മ്യുസിയമായും പ്രവർത്തിക്കുന്നു . വിവിധതരം സ്റ്റാമ്പുകളുടെയും അതുമായി ബന്ധപ്പെട്ട വസ്തുക്കളുമാണ് മ്യുസിയത്തിൽ പ്രദർശിപ്പിച്ചിരിക്കുന്നത് .
ദാൽ തടാകത്തിലെ മറ്റു ഹൗസ് ബോട്ടുകളിൽ താമസിക്കുന്ന ടൂറിസ്റ്റുകൾ ഇവിടം സന്ദർശിക്കുകയും , പ്രദർശിപ്പിച്ചിട്ടുള്ള വ്യത്യസ്ത പോസ്റ്റ് കാർഡുകളിൽ നിന്നും തിരഞ്ഞെടുത്തു ബന്ധുക്കൾക്കും സുഹൃത്തുകൾക്കും അയച്ചു കൊടുക്കുന്നത് പതിവാണ് .എന്നാൽ അവിടത്തെ പൊതുജനങ്ങൾക്ക് ഇത് അത്ഭുതമല്ല മറിച്ചു തങ്ങളുടെ സമ്പാദ്യം സുരക്ഷിതമായി നിക്ഷേപിക്കാനുള്ള ഒരിടമാണ് ഈ തപാൽ ഓഫീസ് . ദാൽ തടാകം സന്ദർശിക്കാൻ എത്തുന്ന ടൂറിസ്റ്റുകളിൽ നിന്ന് ലഭിക്കുന്ന വരുമാനം കൊണ്ട് ജീവിക്കുന്ന ഒരുപാട് ജനങ്ങളുണ്ടിവിടെ .
ഹൗസ് ബോട്ടിൽ പ്രവർത്തിക്കുന്നതിനാൽ , നടത്തിപ്പുകാർക്ക് പല ബുദ്ധിമുട്ടുകളും നേരിടേണ്ടി വരാറുണ്ട്. 2014 ൽ ഉണ്ടായ പ്രളയം ഈ തപാൽ ഓഫീസിന്റെ പ്രവർത്തനത്തെ സാരമായി ബാധിച്ചിരുന്നു .
Comments