കൊറോണ മഹാമാരിയെ പ്രതിരോധിക്കാൻ ഇന്നേറ്റവും കൂടുതൽ ആളുകൾ ആശ്രയിക്കുന്നത് മാസ്കിനെയും സാനിറ്റൈസറിനെയുമാണ് . സാനിറ്റൈസറിന്റെ അമിതമായ ഉപയോഗം ഡോക്ടർമാർ പോലും പ്രോത്സാഹിപ്പിക്കുന്നില്ല . കാരണം ഇവ കൊറോണ വൈറസിനെ നശിപ്പിക്കും എന്നുള്ളത് ഉറപ്പുള്ള കാര്യമല്ല , മാത്രവുമല്ല മറ്റ് കീടാണുക്കൾക്ക് പ്രതിരോധശേഷി വർദ്ധിപ്പിക്കുകയും തന്മൂലം മറ്റ് രോഗങ്ങൾക്ക് കരണമായേക്കാവുന്നതുമാണ് . ചില സാനിറ്റൈസർ നിർമ്മാതാക്കൾ ഹാനികരമായ മെഥനോൾ ധാരാളമായി ഉപയോഗിക്കുന്നു എന്ന ഞെട്ടിപ്പിക്കുന്ന സത്യവും പുറത്തു വന്നു കൊണ്ടിരിക്കുന്നു .
കൺസ്യൂമർ ഗൈഡൻസ് സൊസൈറ്റി ഓഫ് ഇന്ത്യ നൂറ്റി ഇരുപത്തി രണ്ട് സാനിറ്റൈസർ സാംപിളുകൾ പരിശോധിച്ചതിൽ അഞ്ചെണ്ണത്തിൽ മാരകമായ മെഥനോളിന്റെ അംശം കണ്ടെത്തുകയും , നാല്പത്തഞ്ച് സാമ്പിളുകൾ എഫ് ഡി എ നിർദ്ദേശിച്ചിരിക്കുന്ന മാനദണ്ഡങ്ങൾ പാലിച്ചിട്ടില്ല എന്ന് കണ്ടെത്തുകയും ചെയ്തിരിക്കുന്നു .
മുംബൈ , നവി മുംബൈ , താനെ , തുടങ്ങി മഹാരാഷ്‌ട്രയിലെ പല പ്രദേശങ്ങളിലായി ലഭ്യമാകുന്ന സാനിറ്റൈസറുകളുടെ സാമ്പിളുകളാണ് പരിശോധനക്കായി വിധേയമാക്കിയത് . “ഗ്യാസ് ക്രൊമാറ്റോഗ്രഫി ” എന്ന സാങ്കേതിക വിദ്യ ആണ് പരിശോധനക്കായി ഉപയോഗിച്ചിരിക്കുന്നത് . കൊറോണ എന്ന മഹാമാരിയെ പ്രതിരോധിക്കാൻ സാധാരണ സോപ്പ് കൊണ്ട് ഇടവിട്ട് കൈകഴുകുന്നത് തന്നെ ധാരാളമാണ് . എന്നിരുന്നാലും വ്യാപനത്തിന്റെ തോത് കുറക്കുവാൻ വേണ്ടി സാനിറ്റൈസറിന്റെ ഉപയോഗവും ശുപാർശ ചെയ്യപ്പെട്ടിരുന്നു . എത്ര ഭയാനകമായ സാഹചര്യത്തിലൂടെയാണ് മനുഷ്യർ സഞ്ചരിക്കുന്നത് എങ്കിലും , അതും ചൂഷണം ചെയ്യുക എന്ന രീതി എന്നും നിലനിൽക്കും എന്ന് തന്നെയാണ് സി ജി എസ് ഐ പുറത്തു വിട്ടിരിക്കുന്ന പഠനങ്ങൾ സൂചിപ്പിക്കുന്നത് .
വിപണിയിൽ എത്തിക്കുന്ന സാനിറ്റൈസറുകൾ ഉറപ്പായും എഫ് ഡി എ നിർദ്ദേശിച്ചിരിക്കുന്ന മാനദണ്ഡങ്ങൾ അനുസരിച്ചു , സാനിറ്റൈസറിൽ അടങ്ങിയിരിക്കുന്ന വസ്തുക്കളും അവയുടെ അളവും , നിർമ്മാണ തീയതിയും , എക്സ്പയറി തീയതിയും , സുരക്ഷ നിർദ്ദേശങ്ങളും നൽകിയിരിക്കണം . സാനിറ്റൈസർ വാങ്ങുന്ന ഉപഭോക്താക്കളും ഇതെല്ലം ശ്രദ്ധിച്ചു മാത്രമേ വാങ്ങാവൂ . കുട്ടികൾക്ക് എത്താത്ത സ്ഥലങ്ങളിൽ മാത്രം സാനിറ്റൈസർ സൂക്ഷിക്കുക കാരണം അമിതമായ ആൽക്കഹോൾ അടങ്ങിയ സാനിറ്റൈസർ ആണ് ഉള്ളതെങ്കിൽ അപകടം ക്ഷണിച്ചു വരുത്തിയേക്കാം .
പ്രത്യേക അനുമതിയോട് കൂടി മാത്രം ലഭ്യമാകുന്ന ഈതൈൽ ആൽക്കഹോൾ മാത്രമേ സാനിറ്റൈസറിൽ ഉപയോഗിക്കാൻ അനുവാദമുള്ളൂ . എന്നാൽ പെട്ടെന്ന് പണം ഉണ്ടാക്കാൻ ഉള്ള വ്യഗ്രതയിൽ സാനിറ്റൈസർ ഉല്പാദിപ്പിക്കാൻ അനുമതിയില്ലാത്തവർ കൂടി ഈ രംഗത്തേക്ക് പ്രവേശിക്കുകയും , അവർ ഈതൈൽ ആൽക്കഹോളിനു പകരം ഹാനികരമായ മെഥനോൾ ഉപയോഗിക്കുകയും ചെയ്യുന്നു .
സർക്കാരിന്റെ നിയന്ത്രണത്തിൽ മാത്രം ലഭ്യമാകുന്ന ഈതൈൽ ആൽക്കഹോളിനെക്കാൾ സുലഭമായി കിട്ടുന്ന ഒന്നാണ് വ്യാവസായിക ആവശ്യങ്ങൾക്കായി ഉപയോഗിക്കുന്ന മെഥനോൾ . അമിതമായി മെഥനോൾ ശരീരത്തിൽ പ്രവേശിക്കുകയാണെങ്കിൽ , കാഴ്ച ശക്തിയെ വരെ ബാധിക്കാവുന്ന മാരകമായ വിഷമാണ് . മെഥനോൾ അമിതമായി ശരീരത്തിൽ പ്രവേശിക്കുകയാണെങ്കിൽ തലവേദന , തളർച്ച , തലകറക്കം ,ഛർദ്ദി , കാഴ്ച മങ്ങുക , കാഴ്ച ശക്തി ഇല്ലാതാവുക തുടങ്ങി മരണം വരെ സംഭവിക്കാം .
സാനിറ്റൈസർ വാങ്ങുമ്പോൾ ഉപഭോക്താക്കൾ തീർച്ചയായും മുകളിൽ പറഞ്ഞ കാര്യങ്ങൾ ശ്രദ്ധിച്ചു കൊണ്ട് മാരകമായ വിഷം വാങ്ങുന്നത് ഒഴിവാക്കുക . ഏതൊക്കെ നിർമ്മാതാക്കളുടെ സാനിറ്റൈസറുകളിൽ ആണ് ഒഴിവാക്കേണ്ടത് എന്നുള്ള വിശദമായ വിവരം കൺസ്യൂമർ ഗൈഡൻസ് സൊസൈറ്റി ഓഫ് ഇന്ത്യയുടെ വെബ്‌സൈറ്റിൽ ലഭ്യമാണ് [PDF].
