മലയാളികളുടെ അഭിമാനമായി മാറിയിരിക്കുകയാണ് സഞ്ജു സാംസണ്. ഇന്ത്യന് പ്രീമിയര് ലീഗിന്റെ ഈ സീസണില് മികച്ച പ്രകടനമാണ് സഞ്ജു സാംസണ് കാഴ്ച വെച്ചത്. മത്സരത്തില് രാജസ്ഥാന് റോയല്സിനു വേണ്ടി ചെന്നൈ സൂപ്പര് കിങ്സിനെതിരെ ആദ്യ മത്സരത്തില് തന്നെ മികച്ച പ്രകടനമാണ് സഞ്ജു പുറത്തെടുത്തത്. ഒന്പത് സിക്സറുകളും ഒരു ഫോറും ഉള്പ്പെടെ മുപ്പത്തി രണ്ടു പന്തുകളില് നിന്നായി എഴുപത്തി നാലു റണ്സാണ് സഞ്ജു നേടിയത്. ഇന്ത്യന് പ്രീമിയര് ലീഗിന്റെ ഈ സീസണിലെ ഏറ്റവും വേഗമേറിയ അര്ധ സെഞ്ചുറിയാണ് സഞ്ജു നേടിയത്. സഞ്ജു സാംസണിന്റെ മികച്ച ബാറ്റിംഗ് പ്രകടനത്തെ പ്രശംസിച്ചിരിക്കുകയാണ് ക്രിക്കറ്റ് ലോകത്തെ ഇതിഹാസ താരമായ സച്ചിന് തെണ്ടുല്ക്കര്.
ചെന്നൈ സൂപ്പര് കിങ്സിനെതിരെയുളള സഞ്ജുവിന്റെ മികവുറ്റ പ്രകടനത്തിനു ശേഷമാണ് സോഷ്യല് മീഡിയ വഴി സച്ചിന് സഞ്ജുവിനെ പ്രശംസിച്ചത്. തിരുവനന്തപുരത്തുകാരനായ സഞ്ജു സാംസണ് 2013 മുതല് ഇന്ത്യന് പ്രീമിയര് ലീഗിന്റെ ഭാഗമാണ്. 2018 ല് എട്ട് കോടി രൂപയ്ക്കാണ് രാജസ്ഥാന് സഞ്ജുവിനെ സ്വന്തമാക്കുന്നത്. ഇന്ത്യന് പ്രീമിയര് ലീഗിന്റെ കഴിഞ്ഞ രണ്ട് സീസണുകളിലും മികച്ച പ്രകടനം കാഴ്ച വെച്ച സഞ്ജു സെഞ്ചുറിയും നേടിയിരുന്നു. ബാറ്റിങ്ങില് മാത്രമല്ല രാജസ്ഥാന് റോയല്സിനു വേണ്ടി വിക്കറ്റിനു പിന്നിലും മികച്ച പ്രകടനമാണ് സഞ്ജു കാഴ്ച വെച്ചത്.
മത്സര ശേഷം പ്രഖ്യാപിച്ച അവാര്ഡുകളില് നാലെണ്ണവും സ്വന്തമാക്കിയത് സഞ്ജുവാണ്. സച്ചിനു പുറമേ ക്രിക്കറ്റ് താരവും എംപിയുമായ ഗൗതം ഗംഭീറും സോഷ്യല് മീഡിയ വഴി സഞ്ജു സാംസണിന്റെ പ്രകടനത്തെ പ്രശംസിച്ചിരുന്നു. സഞ്ജുവിന്റെ ഇടിവെട്ട് പ്രകടനം ധോണിയെ പോലും അമ്പരപ്പിച്ചു. ബിസിസിഐ അധ്യക്ഷനായ ഗാംഗുലിയും സഞ്ജുവിന്റെ മികവുറ്റ പ്രകടനത്തിനു സാക്ഷിയായി ഗ്യാലറിയിലുണ്ടായിരുന്നു
Comments