ലണ്ടന്: ഇംഗ്ലീഷ് പ്രീമിയര് ലീഗില് ടോട്ടനത്തിനും ലെസ്റ്ററിനും ജയം. ആദ്യമത്സരത്തില് ടോട്ടനം ഹോസ്പെര് വെസ്റ്റ് ബ്രോമിനെയും ലെസ്റ്റര് സിറ്റി വൂള്വ്സിനേയും എതിരില്ലാത്ത ഒറ്റ ഗോളിന് തോല്പ്പിച്ചു.
ആദ്യമത്സരത്തില് ടോട്ടനത്തിനായി നായകന് ഹാരീകെയിനാണ് വിജയഗോള് നേടിയത്. ആദ്യ പകുതിയില് ശക്തമായ പ്രതിരോധം തീര്ത്താണ് വെസ്റ്റ്ബ്രോം ടോട്ടനത്തിന്റെ കരുത്തിന് തടയിട്ടത്. 19 തവണ ഷോട്ടുകളുതിര്ത്ത ടോട്ടനത്തിന് 5 തവണമാത്രമാണ് എതിര് പോസ്റ്റില് കയറാന് സാധിച്ചത്. രണ്ടാം പകുതിയില് കൂടുതല് ആക്രമിച്ച് കളിച്ച ടോട്ടനം 88-ാം മിനിറ്റിലാണ് ഗോളടിച്ചത്. ലീഗില് ടോട്ടനം രണ്ടാം സ്ഥാനത്തും വെസ്റ്റ് ബ്രോം 18-ാം സ്ഥാനത്തുമാണ്.
രണ്ടാം മത്സരത്തില് ലെസ്റ്റര് സിറ്റിയും എതിരില്ലാത്ത ഒരു ഗോളിനാണ് വൂള്വ്സിനെ തോല്പ്പിച്ചത്. 15-ാം മിനിറ്റില് ജാമി വാര്ഡിയാണ് ഗോള് നേടിയത്. ആദ്യ പകുതിയുടെ തുടക്കത്തില് ലഭിച്ച പെനാൽറ്റിയാണ് വാര്ഡി ഗോളാക്കിയത്. ലീഗില് ഒന്നാം സ്ഥാനത്തേക്കാണ് ജയത്തോടെ ലെസ്റ്റര്സിറ്റി കയറിയത്. പോയിന്റ് പട്ടികയിൽ വൂള്വ്സ് 9-ാം സ്ഥാനത്താണ്.
