ലണ്ടൻ: ഇംഗ്ലീഷ് പ്രീമിയർ ലീഗിൽ ഗോൾവർഷത്തോടെ മുന്നേറി മാഞ്ചസ്റ്റർ യുണൈറ്റഡ്. ഇന്നലെ നടന്ന പോരാട്ടത്തിൽ ലീഡ്സിനെതിരെയാണ് യുണൈറ്റഡ് ആറ് ഗോളുകളടിച്ചത്. മത്സരം 6-2ന് മാഞ്ചസ്റ്റർ ടീം സ്വന്തമാക്കി.
കളിയുടെ തുടക്കത്തിൽ രണ്ടു ഗോളുകളതിവേഗം അടിച്ചുകൊണ്ടാണ് മാഞ്ചസ്റ്റർ തുടങ്ങിയത്. രണ്ടും മൂന്നും മിനിറ്റിൽ ഗോളുകൾ പിറന്നു. സ്കോട്ട് മക്ടോമിനേയാണ് രണ്ടു ഗോളുകളും നേടിയത്. തുടർന്ന് 20-ാം മിനിറ്റിൽ ബ്രൂണോ ഫെർണാണ്ടസ് ടീമിന് മൂന്നാം ഗോളും നൽകി.
ആദ്യ പകുതിയിൽ തന്നെ 37-ാം മിനിറ്റിൽ വിക്ടർ ലിൻഡോഫ് നാലാം ഗോൾ ചെമ്പടയ്ക്ക് സമ്മാനിച്ചു. ആദ്യപകുതി അവസാനിക്കും മുന്നേ ലിയാം കൂപ്പറിലൂടെ ലീഡ്സിനായി ആദ്യ ഗോളടിച്ചു. രണ്ടാം പകുതിയിൽ 66-ാം മിനിറ്റിൽ ഡാനിയേൽ ജെയിംസ് മാഞ്ചസ്റ്ററിനായി അഞ്ചാം ഗോളും 70-ാം മിനിറ്റിൽ ബ്രൂണോ ആറാം ഗോളും നേടി.
ലീഡ്സിനായി 73-ാം മിനിറ്റിൽ സ്റ്റുവർട്ട് ഡല്ലാസ് രണ്ടാം ഗോൾ നേടി ലീഡ് 2-6 ആക്കി കുറച്ചു. ജയത്തോടെ യുണൈറ്റഡ് 13 മത്സരങ്ങളിലായി 8 ജയങ്ങളോടെ 26 പോയിന്റുകൾ സ്വന്തമാക്കി മൂന്നാം സ്ഥാനത്തേക്ക് കയറി. ലീഡ്സ് പതിനാലാം സ്ഥാനത്താണ്.
