മിലാൻ: ഇറ്റാലിയൻ ലീഗിൽ പ്രമുഖ ടീമുകൾക്ക് ജയവും തോൽവിയും. ഇന്റർമിലാന് സമനില വഴങ്ങേണ്ടി വന്നപ്പോൾ നാപ്പോളിയും വെറോണയും ഫിയോറന്റീനയും ലാസിയോയും ജയം നേടി.
നാപ്പോളി ഒന്നിനെതിരെ രണ്ടു ഗോളുകൾക്കാണ് ഉദിനീസയെ തോൽപ്പിച്ചത്. കളിയുടെ 15-ാം മിനിറ്റിൽ പെനാൽറ്റി മുതലാക്കി ലോറൻസോ ഇൻസൈൻ നാപ്പോളിയെ മുന്നിലെത്തി. എന്നാൽ 27-ാം മിനിറ്റിൽ കെവിൻ ലസാഗ്ന ഉദിനീസക്കായി സമനിലപിടിച്ചു. കളിയുടെ അവസാന നിമിഷത്തിലെ ഗോളിലൂടെയാണ് നാപ്പോളി ജയം പിടിച്ചുവാങ്ങിയത്. തീമോ മാകായോക്കോവാണ് വിജയഗോൾ നേടിയത്.
രണ്ടാം മത്സരത്തിൽ ഇന്റർ മിലാന്റെ ജയം നിഷേധിച്ച വിജയസമാന സമനിലയാണ് റോമ നേടിയത്. 2-1ന് മുന്നിലെത്തി നിൽക്കെ ഇന്ററിനെ അവസാന നിമിഷത്തെ ഗോളിലൂടെയാണ് റോമ സമനിലയിൽ പിടിച്ചത്. കളിയുടെ 17-ാം ലോറൻസോ പെല്ലിഗ്രിനി റോമയെ മുന്നിലെത്തിച്ചു. രണ്ടാം പകുതിയിൽ ഇന്ററിനായി മിലാൻ ക്രിനിയർ സമനില പിടിച്ചു. 63-ാം മിനിറ്റിൽ ആറാഫ് ഹക്കിമി മികച്ച ഗോളിലൂടെ ഇന്ററിനെ 2-1ന് മുന്നിലെത്തിച്ചു. എന്നാൽ 86-ാം മിനിറ്റിൽ ഗിയാൻ ലൂക്കാ മാൻസിനി ഇന്ററിന്റെ മോഹങ്ങളെ തകർത്ത് സമനില പിടിച്ചു.
മറ്റ് മത്സരങ്ങളിൽ ലാസിയോ പാർമയെ 2-0നും ക്രോട്ടോണയെ 1-2ന് വെറോണയും കാഗ്ലിയാരിയെ എതിരില്ലാത്ത ഒറ്റഗോളിന് ഫിയോറന്റീനയും തോൽപ്പിച്ചു.
