ലണ്ടൻ: ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ യുണൈറ്റഡ് തലപ്പത്ത്. ഇന്ന് നടന്ന മത്സരത്തിൽ ഫുൾഹാമിനെതിരെ 2-1ന്റെ ജയം നേടിയാണ് യുണൈറ്റഡ് ലീഗിൽ മുൻനിരയിലേക്ക് കയറിയത്. കഴിഞ്ഞ സീസണിൽ ഏറെ താഴെ നിൽക്കേണ്ടിവന്ന ക്ഷീണം തീർക്കുകയാണ് മാഞ്ചസ്റ്റർ ടീം.
കളിയുടെ ആദ്യ നിമിഷങ്ങളിൽ തന്നെ യുണൈറ്റഡിനെ ഞെട്ടിച്ച് ഫുൾഹാം ഗോൾ നേടി. 5-ാം മിനിറ്റിൽ അഡേമോലാ ലുക്മാനാണ് മാഞ്ചസ്റ്റർ വല കുലുക്കിയത്. എന്നാൽ 21-ാം മിനിറ്റിൽ എഡിസൺ കവാനി സമനില പിടിച്ചു. രണ്ടാം പകുതിയുടെ 65-ാം മിനിറ്റിൽ പോൾ പോഗ്ബ വിജയ ഗോളും നേടി.
ലീഗിൽ മാഞ്ചസ്റ്റർ ക്ലബ്ബുകളാണ് ഈ ആഴ്ചയിൽ ഒന്നും രണ്ടും സ്ഥാനത്തേക്ക് എത്തിയത്. യുണൈറ്റഡ് 19 കളികളിലായി 12 ജയങ്ങളോടെയാണ് 40 പോയിന്റ് നേടിയത്. സിറ്റി 11 ജയത്തോടെ 38 പോയിന്റുമായി നിൽക്കുന്നു. മൂന്നാം സ്ഥാനത്ത് ലെസ്റ്ററാണ്. നിലവിലെ ചാമ്പ്യൻ ലിവർപൂൾ നാലും ടോട്ടനം അഞ്ചും സ്ഥാനത്താണ്.
Comments