ലണ്ടൻ: സ്വന്തം തട്ടകത്തിൽ ലിവർപൂൾ നാണംകെട്ടു. മാഞ്ചസ്റ്റർ സിറ്റി ഒന്നിനെതിരെ നാല് ഗോളുകൾക്ക് ചെമ്പടയെ കെട്ടുകെട്ടിച്ചു. ഗൻഡോഗന്റെ മികവിലാണ് സിറ്റി ഗംഭീര ജയം സ്വന്തമാക്കിയത്.
കളിയുടെ ആദ്യ പകുതിയിൽ ലഭിച്ച പെനാൽറ്റി പുറത്തേക്ക് അടിച്ച ഗെൻഡോഗൻ നിരാശപടർത്തിയെങ്കിലും രണ്ടാം പകുതിയിൽ ആ ക്ഷീണം തീർത്തു. രണ്ടാം പകുതിയുടെ നാലാം മിനിറ്റിൽ ഗൻഡോഗൻ തന്റെ ആദ്യ ഗോൾ നേടി. എന്നാൽ 63-ാം മിനിറ്റിൽ ലിവർപൂളിനായി മുഹമ്മദ് സല സമനില പിടിച്ചു. പെനാൽറ്റിയാണ് ഗോളാക്കിയത്. 73-ാം മിനിറ്റിൽ ലിവർപൂളിന്റെ പ്രതീക്ഷ അസ്ഥാനത്താക്കി ഗുൻഡോഗൻ രണ്ടാം ഗോളും നേടി. 76-ാം മിനിറ്റിൽ സ്റ്റെർലിംഗും 83-ാം മിനിറ്റിൽ ഫോഡനും ലിവർപൂളിന്റെ വലതുളച്ചു.
കഴിഞ്ഞ സീസണിൽ പ്രീമിയർ ലീഗ് കിരീടം ചൂടി അടുത്ത ദിവസം സിറ്റി സ്വന്തം തട്ടകമായ എത്തിഹാദ് സ്റ്റേഡിയത്തിൽ ലിവർപൂളിനെ തകർത്തിരുന്നു. അതിന് പകരം വീട്ടാനുള്ള അവസരമാണ് ഇല്ലാതാക്കിയത്. തുടർച്ചയായി 17 മത്സരങ്ങൾ സ്വന്തം തട്ടകത്തിൽ ജയിച്ച ലിവർപൂളിന്റെ നിഴൽമാത്രമാണ് ഇന്നലെ കാണാനായത്.
