ന്യൂഡല്ഹി: കൊറോണ രണ്ടാം തരംഗത്തിന്റെ വ്യാപനത്തിന് കാരണം സിങ്കപ്പൂരാണെന്ന കേജരിവാളിന്റെ പരമാര്ശത്തിനെ തള്ളി സിങ്കപ്പൂരിന്റെ ആരോഗ്യമന്ത്രാലയം രംഗത്ത്. ഇന്ത്യയില് രണ്ടാം തരംഗമായി വ്യാപിച്ചത് സിങ്കപ്പൂരില് നിന്നും ജനിതകമാറ്റം സംഭവിച്ച വൈറസാണെന്നാണ് ഡല്ഹി മുഖ്യമന്ത്രി അരവിന്ദ് കേജരിവാള് വിമര്ശിച്ചത്. വിമാനയാത്രക്കാര് വഴിയാണ് രോഗം ഇന്ത്യയിലെത്തി എന്നും കേജരിവാള് കഴിഞ്ഞ ദിവസം പറഞ്ഞിരുന്നു. സിങ്കപ്പൂര് ആരോഗ്യമന്ത്രാലയം ഇതിനെ പൂര്ണ്ണമായും തള്ളുകയും വിയോജിക്കുകയും ചെയ്തിരിക്കുകയാണ്. സിങ്കപ്പൂരിന്റെ പ്രസ്താവനയെ പിന്തുണച്ച് ഇന്ത്യയുടെ വ്യോമയാന വകുപ്പ് മന്ത്രി ഹര്ദീപ് സിംഗ് പുരിയും കേജരിവാളിനെതിരെ രംഗത്തെത്തി.
ഇന്ത്യയിലെ ഉത്തരവാദിത്തപ്പെട്ട ഒരു സ്ഥാനത്തിരിക്കുന്ന മന്ത്രിയില് നിന്നും ഇത്തരം അബദ്ധ ജഢിലവും അവാസ്തവവുമായ ഒരു പരാമര്ശം പ്രതീക്ഷിച്ചിരുന്നില്ല. അത്തരം വൈറസുകളെ സംബന്ധിച്ച് സിങ്കപ്പൂര് ആരോഗ്യമന്ത്രാലയത്തിന് യാതൊരു വിധ അറിവുമില്ല. വിമാനം ഇന്ത്യയിലെത്തിയിട്ടുമില്ല. ഇവിടെ അത്തരം വൈറസ് വ്യാപനം നടന്നിട്ടുമില്ലെന്നും സിങ്കപ്പൂര് ആരോഗ്യമന്ത്രാലയം വ്യക്തമാക്കി.
ഇന്ത്യയിലേക്ക് ഇതുവരെ സിങ്കപ്പൂരില് നിന്നും വിമാന സേവനം പുനസ്ഥാപിക്കപ്പെട്ടിട്ടില്ല. ആകെ വന്ദേഭാരത് മിഷന്റെ ഭാഗമായി മാത്രമാണ് വിമാനങ്ങള് അയച്ചത്. സുരക്ഷാ ബബിള് സംവിധാനത്തില് കൊറോണ രണ്ടാം ഘട്ടത്തില് ഒരു യാത്രയും നടന്നിട്ടില്ലെന്ന് കേന്ദ്ര വ്യാമയാന മന്ത്രി ഹര്ദീപ് സിംഗ് പുരിയും വ്യക്തമാക്കി. 2020 മാര്ച്ച് മാസത്തിന് ശേഷം അന്താരാഷ്ട്ര സര്വ്വീസുകള് ഇന്ത്യയില് നിന്നും നേരിട്ട് ആരംഭിച്ചിട്ടില്ലെന്നിരിക്കേ സിങ്കപ്പൂരില് നിന്നുള്ള വിമാനം വഴി വൈറസ് എത്തി എന്നതിന് എന്താണ് അടിസ്ഥാനമെന്നും പുരി ചോദിച്ചു.
