ന്യൂഡൽഹി: കൊറോണ രണ്ടാം തരംഗമുണ്ടാക്കുന്ന എല്ലാ പ്രതിസന്ധികളേയും തരണം ചെയ്യാൻ ഇന്ത്യയ്ക്കൊപ്പമുണ്ടെന്ന് ഫ്രാൻസ്. ഫ്രഞ്ച് പ്രസിഡന്റ് ഇമ്മാനുവൽ മാക്രോൺ പ്രധാനമന്ത്രി നരേന്ദ്രമോദിയെ നേരിട്ട് ഫോണിൽ വിളിച്ചാണ് പിന്തുണ അറിയിച്ചത്. പ്രധാനമന്ത്രി മാക്രോണിന് ഇന്ത്യൻ ജനതയുടെ നന്ദിയും അറിയിച്ചു.
‘ഫ്രഞ്ച് പ്രസിഡന്റ് ഇമ്മാനുവൽ മാക്രോൺ പ്രധാനമന്ത്രി നരേന്ദ്രമോദിയെ ഫോണിൽ വിളിച്ചു. ഇന്ത്യയുടെ അടിയന്തിര സാഹചര്യവും അതിന്റെ ഗൗരവവും ഫ്രാൻസ് തിരിച്ചറിയുന്നു. ഏതു തരം സഹായത്തിനും ഫ്രാൻസ് ഒരുക്കമാണ്. ഇന്ത്യയിലെ കൊറോണ രണ്ടാം തരംഗത്തെ പ്രതിരോധിക്കാനുള്ള കൂടുതൽ സഹായം എത്തിക്കുന്ന വിഷയം ചർച്ച ചെയ്തു. ഇന്ത്യയ്ക്കൊപ്പമാണ് ഫ്രഞ്ച് ജനതയെന്ന ഐക്യദാർഢ്യ സന്ദേശവും നൽകിയാണ് സംഭാഷണം അവസാനിപ്പിച്ചത്.’ ഇന്ത്യയിലെ ഫ്രഞ്ച് അംബാസഡർ ഇമ്മാനുവൽ ലെനൈൻ പറഞ്ഞു.
മെയ് 1ന് തന്നെ എട്ട് ഓക്സിജൻ നിർമ്മാണ പ്ലാന്റുകളും മറ്റ് ആരോഗ്യ ഉപകരണങ്ങളും എത്തിക്കാൻ സാധിച്ചു. വിമാനമാർഗ്ഗത്തിലും കടൽമാർഗ്ഗത്തിലും ഇന്ത്യയ്ക്കായി ഇനിയും അവശ്യവസ്തുക്കളെത്തിക്കുമെന്നും മാക്രോൺ ഉറപ്പുനൽകിയതായി പ്രധാനമന്ത്രിയുടെ ഓഫീസും അറിയിച്ചു.
Comments