കോട്ടയം: സംസ്ഥാനത്ത് ഓൺലൈനായി പണം അടച്ച് മദ്യം വാങ്ങാനുളള സംവിധാനം ഒരുങ്ങുന്നു. ഓണത്തിന് മുൻപ് ഇത് പ്രാബല്യത്തിൽ വരുത്താനാണ് നീക്കം. ഓണത്തിന് മദ്യശാലകളിൽ ഉണ്ടാകാനിടയുളള തിരക്ക് ഒഴിവാക്കാൻ സംവിധാനം സഹായിക്കുമെന്നും ബിവറേജസ് കോർപ്പറേഷൻ കണക്കുകൂട്ടുന്നു.
കൊറോണ വ്യാപനത്തിന്റെ പശ്ചാത്തലത്തിൽ ബെവ്കോ ഔട്ട്ലെറ്റുകൾക്ക് മുൻപിലെ വലിയ തിരക്ക് ഹൈക്കോടതിയുടെ രൂക്ഷവിമർശനത്തിന് ഇടയാക്കിയിരുന്നു. ഈ സാഹചര്യത്തിലാണ് ആൾക്കൂട്ടം ഒഴിവാക്കാനായി സർക്കാർ ഓൺലൈൻ പേയ്മെന്റ് സംവിധാനം കൊണ്ടുവരുന്നത്. ബെവ്കോയുടെ സൈറ്റിൽ കയറി ആളുകൾക്ക് പണമടയ്ക്കാം. ഇവിടെ നിന്നും ലഭിക്കുന്ന രസീതുമായി ഔട്ട്ലെറ്റുകളിൽ നിന്നും മദ്യം വാങ്ങാവുന്ന രീതിയാണ് പരീക്ഷിക്കുന്നത്.
പരീക്ഷണാടിസ്ഥാനത്തിൽ തിരുവനന്തപുരത്താകും പദ്ധതി ആദ്യം നടപ്പാക്കുക. അടുത്ത ആഴ്ച ജില്ലയിലെ ഒൻപത് ഔട്ട്ലെറ്റുകളിൽ ഓൺലൈൻ പേമെന്റ് വഴി മദ്യവിൽപ്പന ആരംഭിക്കും.
ഓരോ വിൽപ്പനശാലയിലെയും സ്റ്റോക്ക്, മദ്യവില എന്നിവ വെബ്സൈറ്റിൽ ഉണ്ടാകും. ഇതിൽ നിന്നും മദ്യം തെരഞ്ഞെടുത്ത് പണം അടയ്ക്കാം. നെറ്റ് ബാങ്കിംഗ്, ഡെബിറ്റ്, ക്രെഡിറ്റ് കാർഡ്, പേയ്മെന്റ് ആപ്പ് എന്നിവ ഉപയോഗിച്ച് പണമടയ്ക്കാം.
Comments