കൊച്ചി: ആർപ്പോ ആർത്തവം എന്ന് ഉറക്കെ വിളിച്ചതുകൊണ്ടോ ചുംബന സമരം സംഘടിപ്പിച്ചതുകൊണ്ടോ സൃഷ്ടിക്കാൻ കഴിയുന്നതല്ല ലിംഗനീതി. അത് വ്യക്തമായി നിർവ്വഹിച്ച് കാണിച്ചു തരികയാണ് പ്രധാനമന്ത്രി നരേന്ദ്രമോദിയുടെ നേതൃത്വത്തിലുളള കേന്ദ്രസർക്കാർ. നാഷണൽ ഡിഫൻസ് അക്കാദമിയിലും നേവൽ അക്കാദമിയിലും പെൺകുട്ടികൾക്ക് പ്രവേശനം നൽകുന്നതിനുള്ള നടപടികൾ ആരംഭിച്ചുവെന്ന കേന്ദ്രസർക്കാരിന്റെ പ്രഖ്യാപനം രാജ്യത്തെ പെൺകുട്ടികൾക്ക് പുതിയ പ്രതീക്ഷകളാണ് നൽകുന്നത്. കേന്ദ്രസർക്കാറിന്റെ ചരിത്രപരമായ തീരുമാനത്തെ സുപ്രീംകോടതിയും പ്രശംസിച്ചു.
സൈനിക സ്‌കൂളുകളിൽ പെൺകുട്ടികൾക്ക് പ്രവേശനം നൽകുമെന്ന് സ്വാതന്ത്ര്യദിന പ്രസംഗത്തിൽ പ്രധാനമന്ത്രി പറഞ്ഞ വാക്കുകളാണിത്. ഇതാണ് ഇപ്പോൾ യാഥാർത്ഥ്യമായിരിക്കുന്നത്. കേരളത്തിലെ ഏക സൈനിക സ്‌കൂളായ കഴക്കൂട്ടം സൈനിക സ്‌കൂളിൽ ചരിത്രത്തിലാദ്യമായി പെൺകുട്ടികൾക്ക് പ്രവേശനം നൽകി. പ്രവേശന പരീക്ഷ വിജയിച്ച പെൺകുട്ടികളുടെ ആദ്യ ബാച്ച് ആണ് ഇവിടെ തുടങ്ങിയത്. പ്രതിരോധ സേനകളിൽ ഉന്നത റാങ്കിൽ നിയമനമെന്ന പെൺകുട്ടികളുടെ സ്വപ്നം കൂടിയാണ് ഇതിലൂടെ സഫലമാകുന്നത്.
രാജ്യസേവനം സ്വപ്നം കാണുന്ന പെൺമക്കൾക്ക് പരിശീലനം നേടി ഉന്നത സൈനിക പദവികളിലെത്താൻ ഇനി നിയമങ്ങൾ വേലിക്കെട്ട് തീർക്കില്ല. ലിംഗവിവേചനം ഇല്ലായ്മ ചെയ്യുന്നതിനുള്ള സുപ്രധാന ചുവടുവെയ്പെന്നാണ് പരമോന്നത കോടതി തീരുമാനത്തെ വിശേഷിപ്പിച്ചത്. പ്രവേശനത്തിനുള്ള മാർഗരേഖ തയ്യാറാക്കാൻ കേന്ദ്രസർക്കാറിനോട് സുപ്രീം കോടതി നിർദ്ദേശിച്ചിരുന്നു.
അക്കാദമികളിൽ പരിശീലനം വിജയകരമായി പൂർത്തിയാക്കുന്ന പെൺകുട്ടികളെ വിവിധ സേനാവിഭാഗങ്ങളിലേക്ക് നേരിട്ട് പരിഗണിക്കും. രാജ്യത്തെ 33 സൈനിക സ്‌കൂളുകളിലും ഈ അക്കാദമിക് വർഷം മുതൽ പെൺകുട്ടികൾക്ക് പ്രവേശനം ഉറപ്പാക്കും. ഇതിന് മുന്നോടിയായി സൈനിക സ്‌കൂളുകളിൽ 10 ശതമാനം സീറ്റുകൾ പെൺകുട്ടികൾക്കായി മാറ്റി വെച്ചിരുന്നു.
പ്രതിരോധ സേനകളിലെ വനിതാ പങ്കാളിത്തം ഉയർത്താനുളള ചുവടുവെയ്പ് കൂടിയാകും ഇത്. സമൂഹത്തിലുള്ള സ്ത്രീകളുടെ നിർണായക പങ്കിനെ സൈന്യം വിലമതിക്കുന്നുണ്ടെന്നും സർക്കാർ കോടതിയിൽ വ്യക്തമാക്കി.
പെൺകുട്ടികൾക്കായി സൈനിക് സ്‌കൂളുകൾ തുറക്കാൻ കഴിഞ്ഞ വർഷം ശ്രമം നടന്നിരുന്നു. എന്നാൽ ഹോസ്റ്റലുകൾ ഉൾപ്പെടെ മറ്റ് ക്രമീകരണങ്ങൾ ഒരുക്കാൻ കഴിയാത്തതിനാൽ ദൗത്യം സാക്ഷാത്കരിക്കാനായില്ല. നിലവിൽ എല്ലാ ഒരുക്കങ്ങളും പൂർത്തിയായി. ഈ വർഷം മുതൽ പെൺകുട്ടികൾക്ക് സൈനിക് സ്‌കൂളുകളിൽ പ്രവേശനം നേടാമെന്നും കേന്ദ്രസർക്കാർ വ്യക്തമാക്കി.
രാജ്യത്തെ പെൺമക്കൾക്കും സൈനിക് സ്‌കൂളിലേക്ക് പ്രവേശനത്തിനായി സ്വാഗതമെന്നാണ് പ്രധാനമന്ത്രി നരേന്ദ്രമോദി ചെങ്കോട്ടയിലെ സ്വാതന്ത്ര്യദിന പ്രസംഗത്തിൽ പറഞ്ഞത്. പ്രധാനമന്ത്രിയുടെ വാക്കുകളെ ഇരുകൈയ്യും നീട്ടിയാണ് സ്ത്രീസമൂഹം സ്വീകരിച്ചത്. വനിതാ മതിൽ പണിതും ആചാര ലംഘനങ്ങൾ നടത്തിയുമല്ല ലിംഗനീതി നടപ്പിലാക്കുക എന്ന് കാണിച്ചു തരുന്നതാണ് കേന്ദ്രസർക്കാറിന്റെ നടപടി.
