കൊച്ചി : നെടുമ്പാശ്ശേരി വിമാനത്താവളം വഴി കടത്താൻ ശ്രമിച്ച കോടികളുടെ സ്വർണം പിടികൂടി. അഞ്ച് യാത്രക്കാരിൽ നിന്നുമാണ് സ്വർണം പിടികൂടിയത്. ഇവരിൽ നിന്നായി അഞ്ച് കിലോ സ്വർണം പിടികൂടിയതായി അധികൃതർ അറിയിച്ചു.
കസ്റ്റംസും ഡിആർഐയും ചേർന്നാണ് സ്വർണവേട്ട നടത്തിയത്. ചെന്നെയിൽ നിന്നും എത്തിയ നാല് പേരാണ് ആദ്യം പിടിയിലായത്. വിദേശത്തു നിന്നും ചെന്നൈ വിമാനത്താവളത്തിൽ എത്തിയ ആളിൽ നിന്നും സ്വർണം വാങ്ങി ലക്ഷ്യസ്ഥാനത്തേക്ക് കൊണ്ടു പോകുന്നതിനിടെയായിരുന്നു ഇവർ പിടിയിലായത്. ഇതിൽ ഒരാളുടെ പക്കൽ നിന്നും 1100 ഗ്രാം സ്വർണവും, മൂന്ന് പേരിൽ നിന്നുമായി 335 ഗ്രാം സ്വർണം വീതവുമാണ് പിടിച്ചെടുത്തത്. ഇവരെ വിശദമായി ചോദ്യം ചെയ്തതിൽ നിന്നാണ് വിദേശത്തു നിന്നും എത്തിച്ച സ്വർണമാണെന്ന് വ്യക്തമായത്.
ഇവർക്ക് പുറമേ കാസർകോട് സ്വദേശിനിയിൽ നിന്നാണ് വിമാനത്താവളത്തിൽ സ്വർണം പിടികൂടിയത്. ദുബായിൽ നിന്നും എത്തിയ ഇവരിൽ നിന്നും 3250 ഗ്രാം സ്വർണമാണ് പിടികൂടിയത്.
ഇത് കൂടാതെ ദുബായ്- കൊച്ചി വിമാനത്തിൽ നിന്നും ഉപേക്ഷിച്ച നിലയിലും സ്വർണം കണ്ടെടുത്തിട്ടുണ്ട്.
