ന്യൂഡൽഹി: രാജ്യത്ത് ഇതുവരെ 115 കോടി പേർക്ക് കൊറോണ വാക്സിനുകൾ വിതരണം ചെയ്തുവെന്ന് കേന്ദ്ര ആരോഗ്യമന്ത്രാലയം. ആകെ ജനസംഖ്യയുടെ 80 ശതമാനത്തിലധികം പേർ ആദ്യ ഡോസ് വാക്സിൻ സ്വീകരിച്ചുവെന്ന് ആരോഗ്യമന്ത്രി മൻസൂഖ് മാണ്ഡവ്യ അറിയിച്ചു. 41 ശതമാനം ആളുകൾ രണ്ട് ഡോസ് വാക്സിനും സ്വീകരിച്ചു.
ഇതുവരെ വാക്സിനെടുക്കാത്തവരും രണ്ടാം ഡോസ് ലഭിക്കാത്തവരും വീടുകൾ തോറുമുള്ള ഹർ ഖർ ദസ്തക്എന്ന വാക്സിൻ വിതരണ ക്യാമ്പെയിൻ പ്രയോജനപ്പെടുത്തണമെന്നും മന്ത്രി ട്വീറ്റ് ചെയ്തു. രാജ്യത്ത് വാക്സിനേഷൻ വേഗത്തിലാക്കാനുള്ള മെഗാ വാക്സിനേഷൻ ക്യാമ്പാണ് ഹർ ഖർ ദസ്തക്. നവംബർ രണ്ട് മുതലാണ് ക്യാമ്പെയിൻ ആരംഭിച്ചത്.
നവംബർ 30 വരെ നീണ്ടു നിൽക്കുമെന്നും പുറത്തിറങ്ങാൻ സാധിക്കാത്തവർക്ക് അവരുടെ വീടുകളിലെത്തി കുത്തിവെയ്പ്പ് നൽകുമെന്നും മന്ത്രി വ്യക്തമാക്കി. ‘രാജ്യത്ത് വാക്സിനേഷൻ 115 കോടി പിന്നിടുകയാണ്. പ്രധാനമന്ത്രിയുടെ വാക്കുകൾ സത്യമാണ്. ഭാരതീയർക്ക് അസാദ്ധ്യമായത് ഒന്നുമില്ല, വാക്സിനേഷൻ ഇനിയും ശക്തിപ്പെടുത്തും’ മന്ത്രി ട്വിറ്ററിൽ കുറിച്ചു.
Comments