കൊച്ചി : മോൻസൻ മാവുങ്കലിന്റെ സാമ്പത്തിക ഇടപാടുമായി ബന്ധപ്പെട്ട് പ്രാഥമിക അന്വേഷണം ആരംഭിച്ചതായി എൻഫോഴ്സ്മെന്റ്. ഹൈക്കോടതിയിലാണ് ഇക്കാര്യം അറിയിച്ചത്. സാമ്പത്തിക ക്രമക്കേടുമായി ബന്ധപ്പെട്ട കാര്യങ്ങൾ മാത്രമേ അന്വേഷിക്കാൻ അധികാരമുള്ളൂ എന്നും ഇഡി കോടതിയെ അറിയിച്ചിട്ടുണ്ട്.
പോലീസ് കേസെടുക്കാൻ വൈകിയതിനാലാണ് അന്വേഷണം തുടങ്ങാൻ താമസം നേരിട്ടത്. മോൻസനുമായി ബന്ധപ്പെട്ട മറ്റ് വിഷയങ്ങൾ അന്വേഷിക്കാൻ സിബിഐയെ പോലുള്ള മറ്റ് ഏജൻസികളെ നിയോഗിക്കാം. അതാകും ഉചിതമെന്നും ഇഡി കോടതിയിൽ ബോധിപ്പിച്ചു.
മോൻസനുമായി ബന്ധപ്പെട്ട സംഭവങ്ങളെ തമാശയായി കാണാനാകില്ലെന്ന് കോടതിയും വ്യക്തമാക്കി. മോൻസൻ കേസ് അതീവ ഗൗരവമേറിയതാണെന്ന് പറഞ്ഞ കോടതി എഡിജിപിയും ഡിജിപിയും ആരോപണവിധേയരായി എന്നുള്ളതിൽ ആശങ്ക രേഖപ്പെടുത്തി. എൻഫോഴ്സ്മെൻറ് ഡയറക്ടറേറ്റിനെ കോടതി കേസിൽ കക്ഷി ചേർത്തു.
കേസിൽ പ്രവാസി വ്യവസായി അനിത പുല്ലയിലിന്റെ പങ്കിനെക്കുറിച്ച് സംസ്ഥാന സർക്കാരിനോട് കോടതി ആരാഞ്ഞു. ഇക്കാര്യത്തിൽ മറുപടി നൽകാനും സംസ്ഥാന സർക്കാരിനോട് കോടതി നിർദ്ദേശിച്ചു.
Comments